चर्चित हास्य कलाकार केदार प्रसाद घिमिरे 'माग्ने बुढा' को मुख्य भूमिका रहेको फिल्म 'माग्ने राजा' अस्ट्रेलियामा पनि एकै दिनदेखि प्रदर्शनमा आउने भएको छ। भदौ ६ गते अर्थात अगस्ट २२ देखि अस्ट्रेलियाका विभिन्न सहरका २५ हलमा फिल्म रिलिज हुन लागेको हो।
अस्ट्रेलियाको प्रदर्शन अधिकार लिएका थ्रिकेजी इभेन्ट र दृश्य इन्टरटेनमेन्टले फिल्म एक सय शोजका साथ रिलिज हुन लागेको जानकारी गराएका छन्। फिल्मको टिकट बुकिङसमेत खुला भइसकेको र सुरूवाती चरणमै राम्रो प्रतिक्रिया पाइरहेको थ्रिकेजीका गोविन्द भण्डारीले बताए।
दृश्य इन्टरटेनमेन्टकी कृष्टि श्रेष्ठका अनुसार, अस्ट्रेलियामा लामो समयपछि कुनै नेपाली फिल्म हलमा रिलिज हुन लागेको हो।फिल्मको हाइप र सम्भावनालाई ध्यानमा राख्दै पर्याप्त शोजसहित रिलिज गर्न लागिएको उनले बताइन्।
'माग्ने राजा' लाई नमस्ते इन्टरटेनमेन्टले अष्ट्रेलियामा वितरण गर्न लागेको हो। नमस्ते इन्टरटेनमेन्टका देव कार्कीले फिल्मले उत्साहजनक व्यापार गर्ने अपेक्षा रहेको बताएका छन्।
केदार घिमिरे पहिलो पटक मुख्य भूमिकामा देखिएको यो फिल्मको गीत र ट्रेलरलाई दर्शकहरूले रूचाएका छन्। ऋषि लामिछानेद्वारा निर्देशित 'माग्ने राजा' मा केदारसहित वर्षा सिवाकोटी, विल्सनविक्रम राई, शिशिर वाङ्देल, शारदा गिरीलगायत कलाकारहरूको अभिनय छ। फिल्मलाई मुनाल घिमिरेले निर्माण गरेका हुन् भने यसको लेखन सामीप्यराज तिमल्सेनाले गरेका हुन्।
नेपालमा सिनेमा हलहरूले फिल्मको टिकट बिक्री खुलाइसकेका छन्।
-1742801159.jpg)
-1746009348.jpg)
