आन्तरिक राजस्व विभागका महानिर्देशक मदन दाहालले नेपालको कर प्रणालीलाई पूर्णरूपमा डिजिटल बनाउने तयारी तीव्र पारिएको बताएका छन्।
आज (कर दिवसका दिन) देखि नै व्यक्तिगत प्यान र कर चुक्ता पूर्ण डिजिटल भएको उनले जानकारी दिए। उनले यो कदमले करदातालाई ठूलो सहजता प्रदान गर्ने बताए।
‘कर प्रणाली पूर्ण डिजिटल बनाउने तयारीमा छौं,’ उनले भने।
महानिर्देशक दाहालका अनुसार नयाँ डिजिटल प्रणाली लागू भएसँगै सीमित वर्गका करदाताहरूले अब घरबाटै कर चुक्ता प्रमाणपत्र लिन सक्नेछन्।
अब वार्षिक ४० लाखभन्दा कम र एक कार्यालयबाट भुक्तानी लिनेहरूले घरबाटै कर चुक्ता लिन पाउनेछन्।
यो व्यवस्थाले करदाताहरूलाई कार्यालयसम्म धाउनुपर्ने झन्झटबाट मुक्ति दिने विभागको विश्वास छ।
करदाता सेवा कार्यालय विस्थापित हुँदैनन्
केही समयदेखि स्थानीय तहहरूले करसम्बन्धी काम गर्ने चर्चा चलिरहँदा, महानिर्देशक दाहालले तत्कालका लागि करदाता सेवा कार्यालयहरू विस्थापित नहुने स्पष्ट पारे।
‘स्थानीय तहले पूर्णरुपमा काम सुरु नगरेसम्म करदाता सेवा कार्यालय विस्थापित हुँदैनन्,’ उनले भने।
उनले यी कार्यालयहरू करदाताको सहजताका लागि बनाइएको हुनाले तिनको निरन्तरता अपरिहार्य रहेको बताए।
-1763106181.jpg)
-1746009348.jpg)
