बलिउड अभिनेता आमिर खानको होम प्रोडक्सनको फिल्म 'सितारे जमीन पर' नेपालमा बिहीबारदेखि प्रदर्शनमा आउने भएको छ।
भारतमा प्रदर्शनमा आएको एक सातापछि यो फिल्म नेपालमा रिलिज हुन लागेको हो। एप्पल इन्टरटेन्मेन्टले फिल्मलाई नेपाल ल्याएको हो।
फिल्म रिलिज हुने भएपछि हलहरूले शो तालिका सार्वजनिक गर्दै अग्रिम टिकट बिक्री खुलाएका छन्। क्युएफएक्स, वान सिनेमाज लगायतमा फिल्मको टिकट बुकिङ खुलेको छ।
यसअघि फिल्मको राइटस् महंगो भनिएको र त्यसमा कुरा नमिलेपछि नेपाली वितरक पछि हटेका थिए। यो फिल्म नेपालमा रिलिजमा नआउँदा दर्शकहरूले निराशा र चासो व्यक्त गरेका थिए।
खेलकुद-कमेडी ड्रामा 'सितारे जमीन पर' ले भारतमा उत्साहजनक कमाइ गरिरहेको छ। फिल्मले समीक्षा पनि राम्रो पाइरहेको छ।
आमिरका साथमा फिल्ममा जेनेलिया देशमुख, आरूष दत्त, गोपी कृष्णन वर्मा, वेदान्त शर्मा लगायतको अभिनय छ।
प्रसन्न आरएस निर्देशित यो फिल्मलाई आमिर खान र अर्पना पुरोहितले निर्माण गरेका हुन्।
