नेप्से परिसूचकमा देखिएको सुधार दुई दिन पनि टिक्न सकेन। अघिल्लो दुई कारोबारमा बढेको नेप्से सोमबार भने १४.५३ अंकले घटेर २६४७ विन्दुमा आइपुगेको छ।
दुई दिनमा पाँच अंक जोडेको नेप्सेले तेस्रो दिन नै १४ अंक गुमाएको हो।
आइतबार उच्चले बढेको कारोबार रकम सोमबार भने घटेको छ। आइतबार १० अर्ब ८७ करोड रूपैयाँको कारोबार भएको बजारमा सोमबार भने आठ अर्ब १९ करोड रूपैयाँको कारोबार भएको छ।
पछिल्लो केही समयदेखि नेप्से माथिल्लो तहमा आएर निश्चित अंकको उतारचढाव सहित साइडवेज मुभमेन्टमा देखिएको छ।
हाल नेप्से करिब २६ सय देखि २९२९ को विन्दुमा घटबढ भएर साइडवेज मुभमेन्टमा देखिइरहेको छ।
यसअघि १८ सयदेखि २२ सयको चार सय विन्दुको अन्तरमा लामो समयसम्म साइडवेजमा देखिएको थियो। बजार अहिले २६ सयको विन्दुबाट ओरालो लाग्न सकिरहेको छैन भने २९ सयको विन्दु पनि पार गर्न सकिरहेको छैन।
सोमबार तीन सय २७ स्क्रिप्समध्ये एक सय १९ को मूल्य बढेको छ भने दुई सय २२ वटाको मूल्य घटेको छ।
पछिल्लो समय बजारमा केही कम्पनी एकाध दिनलाई मात्रै बढाएर लाभ लिने प्रवृत्ति पनि देखिएको छ। यस्तै, प्रवृत्ति ङादी ग्रुप पावरको सेयरमा पनि देखिएको छ। गत विहीबार र आइतबार लगातार सात प्रतिशतभन्दा धेरैले बढेको कम्पनीको सोमबार भने मूल्य दुई प्रतिशतभन्दा धेरैले घटेको छ।
नेप्सेमा केही दिनअघि मात्रै एक करोड ८५ लाख कित्ता हकप्रद सेयर सूचीकृत भएको कम्पनीको त्यसपछि मूल्य र कारोबार दुवैमा वृद्धि देखियो।
यस्तै यसरी छोटो अवधिलाई मूल्य बढाउने प्रवृत्ति केही समय अघि हिमालयन पावर पार्टनरमा पनि देखिएको थियो।
त्यस्तै, सोमबार बजार घटेपनि केही कम्पनीको एक सय कित्ता किनेकाहरूले एकैदिन करीब १० हजार फाइदा कमाउने अवस्था बनेको छ।
नेपाल माइक्रो इन्सुरेन्स, ग्रिन डेभलपमेन्ट बैंक र मानुषि लघुवित्त वित्तीय संस्थाको सेयर मूल्य एकै दिन ९१ देखि एक सय चार रूपैयासम्म मूल्य बढेको छ।
आइतबार कसैले यी कम्पनीको एक सय कित्ता सेयर किनेको हुन्थ्यो भने भने उसलाई सोमबार एक दिनमै करिब १० हजार रूपैयाँ फाइदा भएको छ। यो कागजी फाइदा हो। सेयर बिक्री पछि मात्रै लगानीकर्ताले वास्तविक लाभ हानी ब्यहोर्छन्।
