सेयर बजारमा पाँच दिनपछि कारोबार रकम चार अर्ब नाघेको छ।
कात्तिक २५ गतेयता हरेक दिन सेयर बजारमा चार अर्बभन्दा कमको कारोबार भइरहेकोमा मंगलबार कारोबार रकम चार अर्ब १० करोड रूपैयाँको कारोबार भएको हो।
सोमबार तीन अर्ब ९४ करोड रूपैयाँको सेयर किनबेच भएको थियो। बजार बढ्न थालेपछि कारोबार रकम पनि बढ्न थालेको हो।
सेयर बजार परिसूचक नेप्से मंगलबार १५.७० अंकले बढेको छ। बजार बन्द हुँदा नेप्से परिसूचक २५६६ विन्दुमा आएको छ।
लगातार दास्रो दिन बजार बढ्को हो। सोमबार पनि बजार ९.७८ अंकले बढेको थियो।
विवादित छवीका उद्योगी दुर्गा प्रसाईंले मंसिर पहिलो साताबाट आन्दोलन गर्ने बताइरहेपछि पनि बजारमा अन्योल देखिएको थियो। सोमबार राति उनी पक्राउ परेपछि पनि बजारमा सकारात्मक प्रभाव परेको हो।
तर, बजारमा कारोबार रकममा सामान्य सुधार अएकोले लगानीकर्ताहरू अझै आश्वस्त हुन नसकिरहेको संकेत भने गर्छ।
कारोबारमा आएका सबै समूह बढेका छन्। होटेल र लगानी समूहमा एक प्रतिशतभन्दा धेरैले वृद्धि भएको छ।
यसदिन तीन सय ५५ लगानी उपकरण कारोबारमा आउँदा दुई सय २८ वटाको मूल्य बढेको छ। ७९ वटाको मूल्य घटेको छ भने बाँकीको स्थिर छ।
हालै सूचीकरण भएका पाँच कम्पनीमा हरेक दिनजसो मूल्य बढेर सर्किट ब्रेक लागेको छ।
सागर डिष्टिलरी, बुंगल हाइड्रो, बन्दिपुर केवलकार, झापा इनर्जी र माबिलुङको सेयर मूल्य करिब १० प्रतिशतले बढेर सर्किट ब्रेक लागेको हो।
२०९१ मा परिपक्व हुने ७.५ प्रतिशत ब्याजदर रहेको एभरेष्ट बैंकको ऋणपत्रको मूल्य सबैभन्दा धेरै ३.५४ प्रतिशतले घटेको छ।
प्रतिइकाइ एक हजार ९० रूपैयाँमा यो ऋणपत्रको कारोबार भएको हो।
साहस उर्जाको सबैभन्दा धेरै रकमको सेयर कारोबार भएको छ। कम्पनीको २२ करोड रूपैयाँको सेयर किनबेच भएको हो।
-1746009348.jpg)
