एकसाथ रिलिज भएका दुई ठूला भारतीय फिल्म 'कुली' र 'वार २' ले प्रदर्शनको ८ दिन पूरा गरेका छन्।
यो अवधिमा यी दुई फिल्मबीचको बक्स अफिस भिडन्तमा रजनीकान्त अभिनित 'कुली' १ अर्बभन्दा बढीले अगाडि देखिएको छ।
'कुली' ले ऋतिक रोशन र जूनियर एनटीआर अभिनीत 'वार २' लाई १ अर्ब १८ करोड भारतीय रूपैयाँले पछि पार्दै विश्वव्यापी बक्स अफिसमा आफ्नो बर्चस्व कायम राखेको भारतीय संचारमाध्यमले जनाएका छन्।
पिंकभिल्लाका अनुसार दुवै फिल्मले पहिलो सप्ताहन्तमा उत्कृष्ट व्यापार गरे पनि साताका अन्य दिनहरूमा भने दुवैको कमाइमा गिरावट आएको थियो।
यद्यपि, 'कुली' ले आफ्नो अग्रता कायमै राखेको छ भने 'वार २' ले पनि बिस्तारै आफ्नो कमाइ बढाउँदै लगेको देखिन्छ।
'कुली' ले बिहीबारसम्म विश्वव्यापी रूपमा ४ अर्ब १८ करोड कमाएको छ। अर्कोतर्फ, 'वार २' ले पनि विश्वव्यापी रूपमा ३ अर्बको आँकडा छुन लागेको छ। यो फिल्मले २ अर्ब ९९ करोड ५० लाख भारू कमाएको जनाइएको छ।
विशेषगरी, भारत र विदेशमा 'कुली' ले पाएको उत्कृष्ट ओपनिङले दुई फिल्मको कमाइमा ठूलो अन्तर देखिएको हो।
अगस्ट १४ मा रिलिज यी दुवै फिल्म नेपाली सिनेमा हलहरूमा पनि प्रदर्शन भइरहेका छन्।
-1746009348.jpg)
