रिलिजको पहिलो दिन फिल्म 'वार २' ले भन्दा 'कुली' ले झन्डै दोब्बर कमाइ गरेको छ।
दक्षिण भारतीय सुपरस्टार रजनीकान्तको फिल्मले बलिउड सुपरस्टार ऋतिक रोशन र दक्षिण भारतीय स्टार जुनियर एनटीआरको फिल्मले भन्दा झन्डै दोब्बर बढी कमाइ गरेको हो।
'कुली' ले बिहीबार विश्वभरबाट १४० करोड भारूभन्दा बढीको कमाइ गरेको छ भने 'वार २' ले ७९ करोड भारूको ग्रस कलेक्सन गरेको भारतीय संचारमाध्यमले जनाएका छन्।
'कुली' बन्यो रजनीकान्तको ५० वर्षे करिअरको सबभन्दा ठूलो ओपनिङ गर्ने फिल्म
'कुली' रजनीकान्तको ५० वर्षे करिअरको सबभन्दा ठूलो ओपनिङ गर्ने फिल्म बनेको छ। यसले रजनीकान्तको अघिल्ला ब्लकबस्टर फिल्महरू 'जेलर' र '२.०' को पहिलो दिनको कमाइलाई पनि उछिनेको छ। 'कुली' तमिल सिनेमाको इतिहासमा पहिलो दिन सबभन्दा धेरै कमाउने फिल्म समेत बनेको छ।
लोकेश कनगराजद्वारा निर्देशित 'कुली' ग्याङ्स्टर एक्सन फिल्म हो। यसले भारतमा मात्र पहिलो दिन लगभग ६५ करोड भारूको नेट कमाइ गरेको छ। भारतमा तमिल संस्करणबाट ४५, तेलुगु संस्करणबाट १५ र हिन्दी संस्करणबाट ४.५ करोड भारू कमाएको हो। भारतबाहेक अन्तर्राष्ट्रिय बजारमा पनि 'कुली' ले ब्लकबस्टर सुरुवात गरेको छ। ‘कुली’ मा रजनीकान्तका साथै श्रुति हासन, नागार्जुन, सत्यराज र आमिर खानको पनि अभिनय छ।
'वार २' को कमाइ अपेक्षाभन्दा कम
ऋतिक रोशन र जुनियर एनटीआर जस्ता ठूला स्टारहरू भएका कारण पनि 'वार २' ले कम्तिमा १०० करोडको ओपनिङ गर्ने अपेक्षा गरिएको थियो, जुन पूरा हुन सकेन।
अयान मुखर्जीद्वारा निर्देशित एक्सन-थ्रिलर 'वार २' ले भारतमा हिन्दी संस्करणबाट २८ करोड नेट (३४ करोड ग्रस) र तेलुगु संस्करणबाट २४ करोड ग्रस कलेक्सन गरेको छ। तमिल संस्करणबाट भएको कमाइ भने नगन्य रहेको जनाइएको छ। विदेशमा फिल्मको प्रदर्शन झनै निराशाजनक रहेको संचारमाध्यमले जनाएका छन्।
सप्ताहन्तको बिदामा फिल्मको कमाइ बढ्ने अपेक्षा गरिएको छ। आइतबारसम्ममा 'वार २' ले विश्वभरबाट ३०० करोडको आँकडा पार गर्न सक्ने अनुमान छ।
'कुली' र 'वार २' नेपालका सिनेमा हलमा पनि प्रदर्शन भइरहेका छन्।
-1755241369.jpg)
-1746009348.jpg)
