अनमोल केसी अभिनीत फिल्म 'जेरी अन टप' ले वर्ष २०८२ मा अहिलेसम्मकै सर्वाधिक कमाउने फिल्मको रेकर्ड बनाएको छ।
विपिन कार्की अभिनीत 'ऊनको स्विटर' को रेकर्ड तोड्दै 'जेरी अन टप' हालसालै वर्षको सर्वाधिक कमाउने फिल्म बनेको थियो। यस फिल्मले १२ करोड रूपैयाँभन्दा माथिको व्यापार गरेको छ। चलचित्र विकास बोर्डका अनुसार फिल्मले सिनेपा बक्सअफिसमा १२ करोड ७ लाख ३४ हजार रूपैयाँ ग्रस कमाइ गरेको छ।
अब भने 'जेरी अन टप' को रेकर्ड नीर शाह अभिनीत फिल्म ‘परान’ ले तोड्ने सम्भावना प्रबल देखिएको छ।
दीपक आचार्य (काकु) निर्देशित कात्तिक १४ गते रिलिज यो फिल्मले कात्तिक २९ गते (१६ दिन) सम्ममा ९ करोड ८६ लाख रूपैयाँ ग्रस कमाइ गरिसकेको छ। आइतबार, सोमबार र मंगलबारको कमाइ जोड्दा फिल्मको कुल कमाइ ११ करोड पुग्ने अनुमान गरिएको छ। ‘परान’ तेस्रो सातामा पनि राम्रो शो र सुखद अकुपेन्सीमा प्रदर्शनरत छ। फिल्मको 'वर्ड अफ माउथ' अत्यन्तै राम्रो छ।
फिल्मले पाएको शो र अकुपेन्सी हेर्दा 'परान' ले आउँदो शनिबारसम्मको बक्सअफिस रिपोर्ट आउँदा कमाइमा 'जेरी अन टप' लाई उछिन्ने सम्भावना प्रबल देखिएको हो। 'जेरी अन टप' भने अहिले पाँचौं सातामा प्रदर्शनरत छ।
चलचित्र विकास बोर्डले हरेक साता बक्सअफिस रिपोर्ट सार्वजनिक गर्दै आएको छ।
-1746009348.jpg)
