प्रहरीले सोमबार मध्यरात भक्तपुरस्थित निवासबाट दुर्गा प्रसाईंलाई पक्राउ गरेको छ।
सार्वजनिक शान्ति भंग गर्ने अभिव्यक्ति दिएकाले उनलाई पक्राउ गरिएको जिल्ला प्रहरी परिसर काठमाडौंका एसपी पवनकुमार भट्टराईले बताएका छन्।
'नागरिक स्वतन्त्रताका नाममा उहाँले सार्वजनिक शान्ति भंग गरिरहनुभएको छ,' एसपी भट्टराईले मंगलबार बिहान सेतोपाटीसँग भने, 'उहाँ सबैलाई अभिव्यक्ति स्वतन्त्रतामा विरोध गर्न पाइन्छ भन्नुहुन्छ। तर अभिव्यक्ति स्वतन्त्रताका आडमा उहाँले गरेका क्रियाकलाप सार्वजनिक शान्ति भंग हुने खालका र अफवाह फैलिने खालका छन्। त्यसैले नियन्त्रणमा लिएर अनुसन्धान थालेका छौं।'
एसपी भट्टराईका अनुसार सार्वजनिक शान्ति खलल पार्न नहुने कसुरमा पक्राउ गरिएका प्रसाईंलाई अहिले जिल्ला प्रहरी परिसर काठमाडौंमा राखिएको छ।
प्रसाईंले पछिल्लो समय आन्दोलन भड्काउने अभिव्यक्ति दिँदै आएका थिए। आफूले ठूलै आन्दोलन गरेर देश ठप्प पार्न लागेको र त्यसका लागि रासनपानी बन्दोबस्त गरेर राख्नू भन्ने जस्ता अभिव्यक्ति दिएर उनले समाजलाई भ्रमित पार्दै आएका थिए।
सामाजिक सञ्जालमा भाइरल भइरहेका उनका अभिव्यक्ति पत्याएर धेरैमा डर र त्रास छाएको थियो।
त्यसबाहेक राजनीतिक तथा निजी क्षेत्रका सार्वजनिक व्यक्तित्वमाथि लाञ्छना लगाउने काम पनि उनले गर्दै आएका थिए। पुष्टि नभएका आधारहिन र भ्रमपूर्ण सूचना फैलाएर राज्यविरूद्ध भड्काउने अभिव्यक्ति पनि दिँदै आएका थिए।
विगतमा माओवादी, एमाले लगायत दलहरूसँग निकट सम्बन्ध बनाएका र केही समयअघि राजावादी प्रचारप्रसारमा लागेका प्रसाईं भड्काउ अभिव्यक्तिका कारण पक्राउ परेको यो चौथो पटक हो। उनी पटक पटक पक्राउ पर्दै धरौटीमा छुट्दै आएका छन्।
चैतमा आसामबाट गरिएको थियो पक्राउ
यसअघि २०८१ चैत १५ को तीनकुने आन्दोलनपछि उनलाई भारतबाट पक्राउ गरी ल्याएको थियो।
त्यति बेला नेपाल प्रहरीका केन्द्रीय प्रवक्ता डिआइजी दिनेश आचार्यले विज्ञप्ति निकालेर प्रसाईं र उनका अंगरक्षक दीपक खड्कालाई झापाको भद्रपुरबाट नियन्त्रणमा लिइएको उल्लेख गरेका थिए।
उनलाई काठमाडौं ल्याएर राज्य विरूद्धको कसुर र संगठित अपराध कसुरमा अनुसन्धान सुरू गरिएको थियो।
तीनकुने घटनामा उनले गाडी हुइँक्याउँदै सुरक्षा घेरा तोडेका थिए र प्रहरीहरूलाई पेलेर अघि बढेका थिए। उनकै उक्साहटका कारण तीनकुने आन्दोलन हिंसात्मक हुँदा दुई जनाको मृत्यु हुनुका साथै २० जना घाइते भएका थिए।
प्रदर्शनकारीहरूले व्यक्तिगत घर, राजनीतिक दलहरूका कार्यालय, भाटभटेनी सुपरस्टोर, जडिबुटी प्रशोधन केन्द्र तथा थुप्रै सरकारी गाडीमा आगजनी पनि गरेका थिए।
प्रसाईं भने घटनालगत्तै फरार भए।
उनलाई खोज्न प्रहरीको विशेष ब्युरोका प्रमुख डिआइजी सिद्धीविक्रम शाहको नेतृत्वमा 'दुर्गा प्रसाई पक्राउ समिति' नै बनेको थियो। त्यही समितिअन्तर्गत प्रसाईंलाई खोज्न वरिष्ठ सई रमेश बजगाईं र सन्तोष धमला भारतको नयाँ दिल्ली पुगेका थिए। दिल्लीमा विभिन्न ठाउँ पुगेर खोज्दा पनि उनी फेला परेनन्।
दिल्लीमै केही समय बिताएको प्रहरी टोलीले प्रसाईंबारे थप सूचना संकलन गर्यो।
प्रसाईं काठमाडौंबाट बाहिरिँदा चढेको गाडी प्रहरीले इटहरीमा फेला पार्यो। इटहरीबाट बरामद भएको गाडीका चालकलाई पनि सोधपुछ गरी प्रहरीले अनुसन्धान थाल्यो। चालकले प्रसाईं झापास्थित बिएन्डसी अस्पताल पुगेको बताए पनि उनी त्यहाँ नगएको खुल्यो।
उनी बीच बाटोबाटै भारतको उत्तराखण्डस्थित प्रयागराज पुगेको सूचना प्रहरीले पायो।
प्राप्त सूचनाहरू पछ्याउँदै जाँदा प्रसाईं प्रयागराजबाट लखनउ, दिल्ली हुँदै राजस्थान पुगेको देखियो। आखिरमा उनी आसामको एउटा घरमा बसेको थाहा भयो। त्यही आधारमा प्रहरी टोली आसाम पुगेर उनी बसेको घरबाटै राति नियन्त्रणमा लिइयो।
उनी आसामको बक्सा भन्ने जिल्लामा बसेका थिए। त्यहाँबाट करिब चार किलोमिटर दुरीमा भुटानको सीमा छ।
नेपाल प्रहरीले यति टाढाबाट कसैलाई पक्राउ गरेको त्यो पहिलो घटना थियो।
त्यति बेला उनलाई वाणिज्य बैंकहरूबाट ऋण लिएर फरक प्रयोजनमा लगाएको भन्दै राष्ट्र बैंक ऐनअनुसार पनि अनुसन्धान गरिएको थियो।
केपी ओलीमाथि जघन्य आरोप लगाएपछि पक्राउ
तीनकुने घटनाभन्दा अगाडि प्रसाईं पक्राउ परेको २०८१ मंसिर ४ गते हो।
तत्कालीन प्रधानमन्त्री केपी शर्मा ओलीमाथि जघन्य आरोप लगाएका मेडिकल व्यवसायी प्रसाईंलाई भक्तपुरको निवासबाट केन्द्रीय अनुसन्धान ब्युरोले पक्राउ गरेको थियो।
त्यति बेला उनलाई साइबर अपराध कसुरमा मुद्दा चलाइएको थियो।
प्रसाईंले कम्बोडियाको टेलिकममा ओलीको साढे ३२ अर्ब रूपैयाँ लगानी रहेको भन्दै भिडिओ कलमार्फत् कसैले देखाएको कागजात सार्वजनिक गरेका थिए।
प्रमाण भन्दै सार्वजनिक गरिएको स्क्रिनसट पत्यारिलो थिएन। त्यही अपत्यारिलो प्रमाण सामाजिक सञ्जालमा व्यापक सेयर गरेर भ्रम फैलाइएको थियो।
ओलीसँगको निकटता टुटेदेखि नै प्रसाईंले उनीविरूद्ध गम्भीर आरोप लगाउँदै आएका थिए। उनले तथ्य–प्रमाण भन्दै प्रस्तुत गरेको चिर्कटोमा ओलीको हस्ताक्षर मात्र होइन, नामसमेत बिग्रिएको थियो।
आपत्तिजनक अभिव्यक्तिपछि पहिलो पटक पक्राउ
'राष्ट्र, राष्ट्रियता, धर्म संस्कृति र नागरिक बचाउ महाअभियान' का नाममा गतिविधि गरिरहेका प्रसाईं पहिलो पटक पक्राउ परेको २०८१ असोज ६ गते हो।
उनलाई भक्तपुरस्थित घरबाटै प्रहरीले नियन्त्रणमा लिएको थियो।
साइबर ब्युरोका प्रहरी पक्राउ गर्न घर पुग्दा उनले सुरूमा गेट खोल्न मानेका थिएनन्। भर्याङ लगाएर घरभित्र प्रवेश गरी प्रसाईंलाई नियन्त्रणमा लिनुपरेको थियो।
त्यति बेला उनीमाथि विभिन्न व्यक्तिलाई आरोपित गरेर आपत्तिजनक अभिव्यक्ति दिएको उजुरी परेको थियो। त्यही उजुरीका आधारमा प्रसाईंसहित जीवन पाण्डे र प्रकाशचन्द्र दाहालविरूद्ध काठमाडौं जिल्ला अदालतबाट पक्राउ पुर्जी जारी भएको थियो।
आफूविरूद्ध पक्राउ पुर्जी जारी भएपछि प्रसाईंले त्यसको विरोध गर्दै खारेज हुनुपर्ने बताएका थिए। उनका समर्थकले मसाल जुलुससमेत निकालेका थिए।
***
-ink-1727001161.jpeg)
-1763106181.jpg)
-1746009348.jpg)
