काठमाडौंमा जेठ १५ गतेदेखि राजसंस्था पुनर्स्थापनालगायत एजेन्डामा आन्दोलन भइरहेको छ।
नवराज सुवेदी नेतृत्वको 'संयुक्त जनआन्दोलन समिति' ले गरेको यो आन्दोलनमा राप्रपा, राप्रपा नेपाललगायत दल तथा समूहहरूको समर्थन छ र शीर्ष नेताहरू पनि आन्दोलनमा सहभागी हुने गरेका छन्।
आइतबार काठमाडौंको नारायणचौरमा राजावादीहरूले प्रदर्शन गरेका थिए। उक्त प्रदर्शनबाट प्रहरीले राप्रपा नेपालका अध्यक्षसमेत रहेका पूर्वगृहमन्त्री कमल थापालाई नियन्त्रणमा लिएको छ।
प्रहरीले थापासहित ६ जनालाई लछारपछार गर्दै नियन्त्रणमा लिएर भ्यानमा राखेर जिल्ला प्रहरी परिसर भद्रकाली लगेको थियो। प्रहरी भ्यानमा पुगेपछि थापाले 'भ्रष्ट सरकार मुर्दावाद, प्रहरी दमन मुर्दावाद' भनेका थिए।
जिल्ला प्रहरी परिसर काठमाडौंका एसपी अपिलराज बोहरा थापासहित ६ जनालाई नियन्त्रणमा लिएको बताए। उनका अनुसार भिडलाई अघि बढ्न थापाले अह्राएका थिए।
निषेधित क्षेत्र तोड्न खोजेको र भिड भड्काउने अभिव्यक्ति दिएको आरोपमा प्रहरीले थापालाई पक्राउ गरेको जनाएको छ। थापाले के अभिव्यक्ति दिएका थिए खुलिसकेको छैन। तर प्रहरीले भने बालुवाटार घेर्न जाऔं भन्ने अभिव्यक्ति थापाले दिएको बताएको छ।
‘प्रदर्शन उहाँले लिड गर्नुभएको थियो। उहाँले बालुवाटार घेर्न जाउ भनेर भिडलाई उक्साउनुभयो। अलिअलि धक्कामुक्का पनि भयो,’ उनले भने, ‘त्यसपछि उहाँसहित ६ जनालाई नियन्त्रणमा लिइएको हो।’
शिला राना, राकेश बस्नेत, रामचन्द्र लामिछाने, विनोद कपाली र सरोज तिम्सिनालाई पनि प्रहरीले नियन्त्रणमा लिएको हो।
उनीहरूलाई प्रहरी परिसर काठमाडौं भद्रकालीमा राखिएको छ।
राप्रपा नेपालका अध्यक्ष कमल थापालाई प्रहरीले नियन्त्रणमा लिएपछि राप्रपा अध्यक्ष राजेन्द्र लिङ्देनले देशभरका साथीहरूलाई आन्दोलनमा बोलाउने बताएका छन्।
‘देशभरबाट साथीहरूलाई बोलाउँछौं, भोलिबाट खास लडाइँ सुरू हुन्छ,’ उनले भने, ‘अब हामी एक ठाउँबाट होइन ५० ठाउँबाट निस्कन्छौं। कमल थापालाई अहिले यहाँ ल्याएर स-सम्मान फिर्ता गर्नुपर्छ।’
राप्रपा प्रवक्ता मोहन श्रेष्ठले कमल थापालाई लछारपछार र दुर्व्यवहार गरिएको भन्दै आपत्ति जनाएका छन्।
शान्तिपूर्ण प्रदर्शनमाथि बर्बर आक्रमण गरिनु राज्यको अत्याचार भएको उल्लेख गर्दै उनले थापा र पक्राउ परेका सबैलाई तत्काल रिहा गर्न माग गरेका छन्।
