नेकपा (माओवादी केन्द्र)ले गृहमन्त्री रमेश लेखकले राजीनामा दिनुपर्न पक्षमा पार्टीको अडान कायमै रहेको बताएको छ।
शुक्रबार अध्यक्ष पुष्पकमल दाहाल 'प्रचण्ड'को निवास खुमलटारमा बसेको पदाधिकारी बैठकमा भिजिट भिसा प्रकरणमा गृहमन्त्री लेखकले राजीनामा दिनुपर्न अडानमै पार्टी रहेको निर्णय गरिएको प्रवक्ता अग्नी सापकोटाले बताए।
'संसदमा बजेट प्रस्तुत गर्न मात्रै दिएका हौं। गृहमन्त्रीले राजीनामा दिनुपर्ने यसअघिको निर्णय कायमै छ,' सापकोटाले भने।
आजको बैठकले माओवादीको मध्यपहाडी राजमार्गकेन्द्रित अभियान पुनः जेठ २१ गतेदेखि सुरू गर्ने निर्णय गरेको छ। यसअघि पोखरा पुगेर स्थगित भएको अभियान बिहीबार लमजुङबाट सुरू हुने प्रवक्ता सापकोटाले बताए।
बैठकले माओवादी केन्द्रसँग एकीकरण गरेको नेपाल समाजवादी पार्टीका सहअध्यक्ष गंगानारायण श्रेष्ठसहितका नेताहरू र नेपाः राष्ट्रिय पार्टीका नेताहरुको जिम्मेवारीबारे छलफल भएको सापकोटाले बताए।
साथै पार्टीको अन्य मोर्चा, जनवर्गीय संगठनहरूबारे पनि छलफल भएको उनले बताए।
