पछिल्लो समय बिजुलीबाट चल्ने सवारी साधनहरूमा स्टाइल र प्रविधिको गज्जब संयोजन देख्न पाइएको छ।
संसारभरका अटोमोबाइल उत्पादक कम्पनीहरूले स्टाइल र प्रविधि दुवैलाई बराबर महत्त्व दिएर एक–से–एक उम्दा कार बजारमा ल्याइरहेका छन्। त्यसमा पनि चिनियाँ अटोमोबाइल उत्पादकहरूले संसारभरका कम्पनीलाई कडा टक्कर दिइरहेका छन्।
तिनैमध्ये एक हो, चिनियाँ कम्पनी चांगान अटोमोबाइल।
करिब ४० वर्षदेखि सक्रिय चांगान आजको समय चीनको तेस्रो ठूलो अटोमोबाइल उत्पादक हो। संसारभरि यसका ३४ वटा उत्पादन केन्द्र छन्। यो पहिलो त्यस्तो चिनियाँ कम्पनी हो, जसले उत्पादन गरेका गाडी संसारभरि ३० लाखको संख्यामा बिक्री भएका छन्।
यसले चांगानका विभिन्न मोडलसहित पछिल्लो समय 'स्टाइलिस' र 'ट्रेन्डी' आवरणका कारण संसारभरि तहल्का पिटेको 'दिपल' ब्रान्डका बिजुली गाडी पनि उत्पादन गर्दै आएको छ।
नेपालका लागि चांगानको आधिकारिक वितरक 'एमएडब्लू वृद्धि अटोकर्प' ले गत साता मात्र दिपलको नयाँ मोडल सार्वजनिक गर्यो – दिपल एस–०५।
भुकुटीमण्डपमा भदौ ३ देखि सुरू 'नाडँ अटो शो' मा अन्य विभिन्न मोडलका सवारी साधनसँगै दिपलको नयाँ कार पनि प्रदर्शनीमा राखिएको छ। नेपाल अटोमोबाइल्स डिलर्स एसोसिएसन (नाडा)ले आयोजना गरेको यो प्रदर्शनी भदौ ८ गतेसम्म चल्नेछ।
यो स्टोरीमा हामी पहिलो दिनको प्रदर्शनीमै धेरै दर्शकको ध्यान खिचेर 'हटकेक' बनेको दिपलको नयाँ मोडलका विशेषताबारे चर्चा गर्दैछौं।
एमएडब्लूले दिपल एस–०५ का दुई संस्करण बजारमा ल्याएको छ – प्लस र म्याक्स।
'प्लस' संस्करण सस्तो छ। यो ४९ लाख ९९ हजार रूपैयाँ पर्छ। अहिले यसको सुरूआती मूल्य ४८ लाख ९९ हजार तोकिएको छ।
यसको दाँजोमा 'म्याक्स' महँगो पर्छ। यसको मूल्य ५६ लाख ९९ हजार हो। कम्पनीले केही समयका लागि यो संस्करणमा दुई लाख रूपैयाँ छुट दिएको छ।
अब हामी यी दुवै संस्करणका मोटर र ब्याट्री क्षमताको कुरा गरौं।
दुवैमा चुम्बक भएको इलेक्ट्रिक मोटर प्रयोग गरिएको छ, जसले ९९ किलोवाटको अधिकतम शक्ति दिन्छ। यो भनेको १३५ हर्सपावर बराबरको शक्ति हो। बोलीचालीको भाषामा भन्दा यो इलेक्ट्रिक कारले १३५ वटा घोडा बराबरको शक्ति दिन्छ भन्ने बुझिन्छ।
भन्नुको मतलब, यो मोडल शक्तिशाली कारको वर्गमा पर्छ। मोटरको शक्ति जति बढी भयो, गाडी उति छिटो गुड्छ। त्यसैले यो तीव्र गतिमा हुइँकिन सक्ने र कम समयमा धेरै रफ्तार लिने कार हो। अन्य देशहरूमा यो अधिकतम १८० किलोमिटर प्रतिघन्टाको गतिमा गुडेको पाइएको छ। त्यस्तै, ७.३ सेकेन्डमै १०० किलोमिटर प्रतिघन्टाको रफ्तार समातेको पनि पाइएको छ।
मध्यम र लामो दुरीको यात्राका लागि यो क्षमता राम्रो मानिन्छ। नेपालको भूबनोटमा कच्ची बाटोहरू धेरै भएकाले यो गाडी उपयुक्त हुनेछ। सँगसँगै, यसको इन्जिनले आवाज कम निकाल्नुका साथै ब्याट्री पनि कम खान्छ।
ब्याट्रीको कुरा गर्दा दिपल एस–०५ मा ५६.१२ किलोवाट–घन्टा क्षमताको प्रयोग गरिएको छ।
यो भनेको ब्याट्रीले बिजुली खपत गर्ने क्षमता हो। हामीले एक किलोवाट–घन्टा क्षमताको हिटर एक घन्टा चलाउँदा एक किलोवाट बिजुली खपत हुन्छ। यसबाट यो ब्याट्रीले एक घन्टा गाडी गुड्दा ५६.१२ किलोवाट बिजुली खपत गर्छ भन्ने बुझिन्छ।
ब्याट्री क्षमता जति ठूलो भयो, गाडीले त्यति लामो यात्रा गर्न सक्छ। अर्थात्, यो गाडीको ब्याट्री फुल चार्ज हुँदा ४०५ किलोमिटर गुड्न सक्छ। यो भनेको लगभग काठमाडौंबाट पोखरा गएर फर्किन सकिने दुरी हो।
यो ब्याट्री घरमा चार्ज गर्दा शतप्रतिशत चार्ज हुन करिब नौ घन्टा लाग्छ। तर १५० किलोवाट क्षमताको डिसी फास्ट चार्जिङ प्रयोग गर्दा १५ मिनेटमै ३० प्रतिशतबाट ८० प्रतिशत चार्ज हुन्छ।
भृकुटीमण्डपमा मंगलबारबाट सुरू नाडा अटो शोमा 'दिपल एस-०५' कार हेर्नेहरूको भिड। तस्बिर: नवीनबाबु गुरूङ/सेतोपाटी
अब हामी गाडीको बाहिरी र भित्री डिजाइनको कुरा गरौं।
यसको लम्बाइ ४.६२ मिटर छ भने चौडाइ १.९ मिटर र उचाइ १.६ मिटर छ। यो गाडीको 'ग्राउन्ड क्लियरेन्स' अर्थात् सबभन्दा तल्लो भाग र जमिनको सतहबीचको दुरी ६.८९ इन्च छ। उबडखाबड बाटोमा पनि गाडीको तल्लो भागले भुइँ छुने समस्या आउँदैन।
यसबाहेक अगाडि र पछाडिका पांग्राबीचको दुरी २.८ मिटर छ। यसलाई प्राविधिक भाषामा 'ह्विलबेस' भनिन्छ। ह्विलबेस धेरै भएको गाडीमा यात्रुहरूलाई खुट्टा राख्ने ठाउँ धेरै हुन्छ। उच्च गतिमा गुड्दा पनि गाडीको सन्तुलन स्थिर रहन्छ। कच्ची बाटोमा सन्तुलित ढंगले गाडी हाँक्न सकिन्छ।
डिजाइनकै कुरा गर्दा दिपल एस–०५ मध्यम आकारको एसयुभी हो। झट्ट हेर्दा यो दिपलकै एस–०७ जस्तो देखिए पनि यसका विशेषता फरक छन्।
उदाहरणका लागि — अगाडिबाट हेर्दा यसका हेडलाइटहरूको डिजाइन फरक र आकर्षक देखिन्छ। ग्रिलको छेउमा र बम्परको तल लेड–लाइट प्रयोग गरिएको छ। बम्परको तल्लो भागमा 'एयर फ्ल्याप' पनि राखिएको छ, जसले इन्जिनमा हावा प्रवाह सन्तुलित राख्छ। यसले ब्याट्री चिसो राख्न मद्दत गर्छ।
एस–०७ को तुलनामा यसको आवरणमा देखिने अन्तर टायरको आकार हो।
दिपलको एस–०७ मा २० इन्चका टायर प्रयोग गरिएका छन् भने यसमा १८ इन्चका टायर छन्। ढोका, छत र ह्यान्डल भने लगभग उस्तै छन्। पछाडि प्रयोग गरिएको टेललाइट पनि आकर्षक छ।
यो गाडी खैरो, सेतो, निलो, कालो र चाँदी रङमा उपलब्ध छन्। भित्र भने निलो, खैरो र सुन्तला रङमा किन्न पाइन्छ।
यसमा चालक र अगाडिका यात्रु सिटको बीचमा १४.४ इन्चको स्क्रिन छ। यो स्क्रिनलाई आवश्यकताअनुसार चालक र यात्रुले आ–आफूतिर मोड्न वा घुमाउन सक्छन्।
सिटहरूमा स–साना छिद्र बनाइएका छन्, जसले हावाको आवागमन गराउँछ। यस्तो सिटमा बस्दा गर्मीमा पसिना कम आउँछ। जाडोमा सिट तातो राख्न पनि मद्दत गर्छ। लामो यात्राका लागि यस्ता सिट आरामदायी हुन्छन्।
दिपल एस–०५ को 'म्याक्स' संस्करणमा अगाडिका यात्रुको सिटमा थप सुविधा छ। त्यो भनेको सिटलाई सुत्न वा आराम गर्न मिल्ने गरी ढल्काउन सकिन्छ। अन्य सामान्य सिटभन्दा यो आरामदायी हुनुका साथै लामो यात्राका लागि सुविधायुक्त हुन्छ।
त्यस्तै, यसमा ५० वाटको ताररहित चार्जर समावेश गरिएको छ। साउन्ड सिस्टम गुणस्तरीय बनाउन दिपलले 'प्लस' संस्करणमा ८ वटा स्पिकर र 'म्याक्स' मा १४ वटा स्पिकर प्रयोग गरेको छ।
जहाँसम्म छतको कुरा छ, 'प्लस' मा सामान्य खालको छत छ भने 'म्याक्स' मा सिसाको छत छ। यसले यात्रा गरिरहँदा घामको प्रकाश आउनुका साथै बाहिरको दृश्य राम्ररी हेर्न सकिन्छ।
यो गाडीको 'टर्निङ रेडियस' ५.७५ मिटरको छ। यसको मतलब, साँघुरो बाटोमा पनि सजिलै मोड्न सकिन्छ। यो अंक थोरै छ भने साँघुरो बाटोमा मोड्ने क्षमता बढी हुन्छ। टर्निङ रेडियस धेरै भएको गाडी घुमाउन फराकिलो ठाउँ चाहिन्छ। त्यही भएर दिपल एस–०५ काठमाडौं लगायत सहरी क्षेत्रका साँघुरा बाटामा चलाउन सजिलो हुने देखिन्छ।
यसमा पाँचवटा क्यामरा प्रयोग गरिएका छन्। यी क्यामराले वरिपरिका दृश्य ३६० डिग्रीमा हेर्न मद्दत गर्नुका साथै पार्किङ गर्न पनि सहज बनाउँछ।
नेपालमा मनसुन बेला र हिउँदमा हुस्सु लाग्दा अगाडिको दृश्य राम्ररी नदेखेर चालकलाई गाह्रो पर्छ। क्यामरा जडान गरिएका यस्ता गाडीले प्रतिकूल मौसममा पनि बाटो सफा देखिने हुँदा हाँक्न सहज हुन्छ।
सबभन्दा रोचक कुरा त, यसमा ४–के क्षमताको गिम्बल क्यामरा पनि उपलब्ध छ, जुन १२० डिग्रीमा घुम्छ। यात्रा गर्दा वरिपरिका दृश्य रेकर्ड गर्न सकिन्छ। तपाईं यात्रा गर्दै भ्लगहरू बनाउन सक्नुहुन्छ।
दिपल एस–०५ को अर्को खास विशेषता 'रिमोट पार्किङ' हो। साँघुरो ठाउँमा पार्किङ गर्न यो सुविधा निकै फाइदाजनक हुन्छ।
मानौं, कहीँ गाडी मात्र छिर्ने ठाउँ छ, जहाँ पार्क गरेपछि चालकलाई ढोका खोलेर बाहिर आउन अप्ठ्यारो हुन्छ। यस्तो अवस्थामा चालकले पहिले नै गाडीबाट ओर्लेर रिमोट कन्ट्रोलका माध्यमबाट पार्क गर्न सक्छन्।
त्यस्तै, निकाल्ने बेला पनि रिमोटको बटन दबाएर गाडीलाई पार्किङबाट बाहिर निकाल्न सक्छन्।
यसमा ६ किलोवाटको 'भिटूएल' (भेहिकल–टू–लोड) प्रणाली पनि छ। यो प्रविधिमार्फत् तपाईं आफ्नो गाडीलाई अन्य घरायसी उपकरणहरूको निम्ति बिजुली स्रोतका रूपमा प्रयोग गर्न सक्नुहुन्छ। खासगरी बिजुली कटौती हुँदा वा आपतकालीन अवस्थामा यो सुविधा निकै उपयोगी हुनसक्छ।
सामान्य भाषामा भन्नुपर्दा, तपाईंको गाडीले आपतकालीन अवस्थामा घरमा बिजुली आपूर्ति गर्ने 'पावर बैंक' को काम गर्छ।
यो गाडीमा दुर्घटना जोखिम कम गर्न केही विशिष्ट प्रविधि प्रयोग गरिएका छन्।
जस्तै – यसमा 'अटोमेटिक स्पिड कन्ट्रोल' सुविधा छ। अगाडि अरू कुनै सवारी साधन छ भने यसले क्यामराको मद्दतले आफ्नो गति आफै समायोजन गर्छ। अर्थात्, अगाडिको गाडीको गति कम हुँदा यसको गति पनि स्वत: कम हुन्छ। ताकि, गाडी ठोक्किनबाट बचोस्। र, जब सडक खाली हुन्छ, गाडीको गति आफै बढ्छ।
'अटोमेटिक इमर्जेन्सी ब्रेकिङ' सुविधा यसको अर्को विशेषता हो। गाडीको अगाडि वा दायाँबायाँ कुनै अर्को गाडी, पैदलयात्रु वा कुनै चिज आयो भने सेन्सरले पत्ता लगाउँछ र ठोक्किनबाट बचाउन स्वत: ब्रेक लगाउँछ। यस्तो सुविधाले दुर्घटना जोखिम निकै कम गर्छ।
यो गाडीमा 'ड्राइभर ड्राउजिनेस डिटेक्सन' प्रविधि पनि प्रयोग गरिएको छ। गाडी चलाउँदा चलाउँदै चालकको ध्यान बाटोबाट हटेको अवस्थामा यो सिस्टमले सतर्क गराउँछ। यस निम्ति गाडीमा जडान गरिएका क्यामराले चालकको अनुहार निरन्तर अनुगमन गरिरहेको हुन्छ। चालक निदायो वा अन्यत्र ध्यान दियो भने यो सिस्टमले आवाज वा भाइब्रेसन निकाल्छ। चालक निदाएर वा चालकले बाटोमा ध्यान नदिएर हुने दुर्घटना कम गर्न यसले मद्दत गर्छ।
त्यस्तै, यसमा 'ब्लाइन्ड–स्पट डिटेक्सन' सुविधा पनि छ। हरेक गाडीको पछाडि वा छेउमा केही ठाउँ यस्तो हुन्छ, जुन चालकले लुकिङ ग्लासमा हेर्दा पनि देख्दैन। त्यस्तै ठाउँमा कोही पैदलयात्रु वा साइकल–बाइक आयो भने दुर्घटना पर्छ। यो गाडीले भने त्यस्ता नदेखिने ठाउँमा कोही व्यक्ति वा गाडी आउँदा चालकलाई सूचना दिन्छ। यसले भिडभाडमा गाडी हुइँक्याउन र लेन परिवर्तन गर्दा दुर्घटना जोखिम घटाउन मद्दत गर्छ।
दुर्घटना पर्दा यात्रुहरूको सुरक्षा निम्ति गाडीमा एयरब्याग राखिएका छन्। गाडी कतै ठोक्किँदा वा दुर्घटना पर्दा यी एयरब्याग आफै खुल्छन्। यसले यात्रुको शरीर गाडीको भित्तामा ठोक्किनबाट बचाउँछ।
दुर्घटना पर्दा यात्रुहरूलाई धेरै चोटपटक लाग्ने भित्तामा ठोक्किएर हो। एयरब्याग राम्रो र बलियो छ भने यस्तो जोखिम कम हुन्छ।
***
यी पनि पढ्नुहोस्:
-1746009348.jpg)
