दोस्रो संस्करणको सिद्धार्थ बैंक नेपाल प्रिमियर लिग (एनपिएल) सुरू हुने अघिल्लो दिन कीर्तिपुरस्थित त्रिवि क्रिकेट अन्तर्राष्ट्रिय क्रिकेट रंगशालामा सरकारले राष्ट्रिय खेलकुद परिषदमार्फत नेपाल क्रिकेट संघ (क्यान) लाई हस्तान्तरण गरेको छ।
सहरी विकास मन्त्रालयले निर्माण गरेको पहिलो चरणको रंगशाला आइतबार साँझ कीर्तिपुर मैदानमा आयोजन कार्यक्रममा हस्तान्तरण गरिएको हो। सहरी विकास मन्त्री कुलमान घिसिङले राष्ट्रिय खेलकुद परिषदका सदस्यसचिव टंकलाल घिसिङ र क्यान अध्यक्ष चतुरबहादुर चन्दलाई हस्तन्तरण गरिएको प्रमाणपत्र दिएका थिए।
गत वर्ष एनपिएलमा दर्शकको क्रेज देखेर तत्कालीन सरकारले रंगशालामा प्यारापिट निर्माण गर्ने र फ्लडलाइटमा जडान गरेर राति खेल खेलाउने उद्देश्य स्वरूप त्रिवि मैदानको स्तरोन्नति गर्ने काम अघि बढाएको थियो।
गत वर्षको फागुनको तेस्रो सातादेखि काम सुरू गरिएको रंगशालामा अहिले दश हजार सिट क्षमताको नयाँ प्यारापिट निर्माण सकिएको छ। ४३ करोड ७७ लाख रुपैयाँमा ठेक्का भएको प्यारापिटको पहिलो चरणको काम सकिएको छ। सरकारले यसमा गुरुयोजना गरेर ३० हजार दर्शक अट्ने रंगशाला बनाउने योजना अघि सारेको छ।
प्यारापिट मैदानको पूर्वी र पश्चिम गरी दुई खण्डमा छ। पूर्वी खण्डमा २ हजार २ सय ९० कुर्सी र पश्चिम खण्डमा ७ हजार ७ सय १० कुर्सी जडान गरिएको छ। भिआइपीतर्फ थप ३ हजार दर्शक अट्ने गरी अस्थायी प्यारापिट बनाइएको छ। जसका कारण यसपटक १३ हजार दर्शकले एकै पटक बसेर खेल हेर्न सक्नेछन्।
एनपिएलअघि प्यारापिटको काम पनि सकिएको छ। फ्लडलाइटको पनि सहरी विकास मन्त्री कुलमान घिसिङले स्वीच दबाएर उदघाटन गरेका थिए। मंसिर १ देखि सुरू हुने एनपिएल २७ दिनसम्म चल्नेछ भने आठ फ्रेञ्चाइज टोलीले प्रतिस्पर्धा गर्नेछन्। ३२ खेलमध्ये फ्लडलाइटमा २३ खेल हुने तय छ।
रंगशालामा ४२ करोड १९ लाख ९१ हजार रुपैयाँ लगातमा ६ वटा फ्लडलाइट जडान भएका छन्।
क्रिकेटको क्रेजलाई मध्यनजर राखेर तत्कालीन केपी ओली नेतृत्वको सरकारले पहिलो पटक प्यारापिट र फ्लडलाइट सहितको रंगशाला बनाउने निर्णय गरेको थियो। सहरी विकास मन्त्रालयअन्तर्गत काम सुरु गर्दा प्यारापिट र फ्लडलाइट जडानको काम वैशाखसम्म सक्ने सम्झौता भए पनि विभिन्न प्राविधिक समस्याले धकेलिएको थियो।







