राष्ट्रिय खेलकुद परिषदले नेपाली खेलाडीको स्वास्थ्य उपचार गर्नका लागि स्पोर्ट्स मेडिसिन एन्ड रिसर्च सेन्टर सञ्चालन गर्ने भएको छ।
सेन्टर सञ्चालनअघि मोडालिटी लगायतका पक्षको अध्ययन गरी प्रतिवेदन बुझाउन कार्यदल समेत गठन गरिएको छ।
कार्यदलको संयोजक डा अभिषेक राज सिंहलाई तोकिएको छ। समिति सदस्यमा डा. घनश्याम पाण्डे छन्। सचिवको रुपमा राष्ट्रिय खेलकुद परिषदअन्तर्गतको खेल चिकित्सा तथा अध्ययन केन्द्रका प्रशासकिय अधिकृत दोवे तामाङलाई जिम्मेवारी दिइएको छ।
परिषदका प्रशासन विभागका प्रमुख भोजानन्द राईले समिति गठन गरिएको र त्यसको व्यवस्थापन परिषदबाट हुने व्यहोरा उल्लेख गरेका छन्।
यसअघि खेलकुद मन्त्रालयले कात्तिक २८ गते राष्ट्रिय खेलकुद परिषदको मातहतमा स्पोर्ट्स मेडिसिन एन्ड रिसर्च सेन्टर सञ्चालनको स्वीकृति सम्बन्धयमा आवश्यक प्रक्रिया अघि बढाउन पत्राचार गरेको थियो।
रिसर्च सेन्टरको सञ्चालनका लागि गठन गरिएको कार्यदलको कार्यदिन ९० दिनेको हुनेछ। यो अवधि भित्रमा कार्यदलले रिसर्च सेन्टर सञ्चानलका लागि चाहिने र गर्न सकिने पक्षहरू समेट्दै प्रतिवेदन दिनेछ।
नेपालमा खेलाडीको उपचारको केन्द्रीत भएर काम गर्न सक्ने अस्पतालको अभाव छ। राष्ट्रिय खेलकुद परिषदमा रहेको खेलकुद चिकित्सा अध्ययन केन्द्रले सामान्य उपचार मात्रै गर्दै आएको छ। अब बन्ने अस्पतालले खेलाडीका सबै खालका उपचार गर्न सक्ने अपेक्षा गरिएको छ।
रिसर्च सेन्टर सञ्चालनका लागि गठित कार्यदलका संयोजक अभिषेकले यसअघि नेपाल क्रिकेट संघ (क्यान) मा संलग्न रहेर काम गरिसकेका छन्। उनले नेपाली राष्ट्रिय क्रिकेट टिमको मेडिकल संयोजक भएर काम गरेका थिए। त्यतिबेला उनले नेपाली राष्ट्रिय क्रिकेट टिमको मेडिकल सम्बन्धी सम्पूर्ण कुराको सहजीकरण गरेका थिए।
-1746009348.jpg)
