ललितपुर, जावलाखेल रहेको चिडियाखानाको एक मात्र रेडपान्डा (हाब्रे) चोर्न खोजेको आरोपमा प्रहरीले दुई जनालाई पक्राउ गरेको छ।
जिल्ला प्रहरी परिसर ललितपुरको टोलीले दुई जनालाई पक्राउ गरेको एसपी चक्रराज जोशीले जानकारी दिए।
पक्राउ पर्नेमा धादिङ घर भई काठमाडौको स्वयम्भू क्षेत्र बस्ने २१ वर्षीय कृष्ण गुरूङ र भारत घर भई स्वयम्भू बस्ने २६ वर्षीय मोहमद तफिक छन्। यो घटनामा संलग्न अझै दुई जना फरार छन्।
उनीहरूले वैशाख ३० गते राति १० बजेतिर रेडपान्डा चोरी गर्ने प्रयास गरेका थिए। चोरी गर्न असफल भएपछि गुरूङ र तफिक सहित चारै जना आफूले बोकेको झोला, जुत्ता पनि छाडेर भागेका थिए।
यो खबरपछि परिसरबाट एसएसपी श्यामकृष्ण अधिकारीको टोली घटनास्थलमा खटिएको थियो।
सिसिटिभी फुटेजबाट प्रहरीले सुरूमा ती व्यक्तिहरूको पहिचान खुलाएको थियो। अनुसन्धानबाट पक्राउ परेका तफिक र अर्का भारतीय नागरिक स्वयम्भू क्षेत्रमा चराचुरूंगी बेचबिखनको व्यवसाय गर्छन्।
उनीहरू वैशाख ३० गते भन्दा चार/पाँच दिनअघि पनि चिडियाखानामा प्रवेश गरेका थिए। त्यति बेला उनीहरूले रेडपान्डा राखिएको ठाउँ, झ्याल, ढोका, भित्र प्रवेश गर्न सक्ने स्थानहरू, सिसिटिभीले खिच्न सक्ने ठाउँ लगायतबारे अध्ययन गरेको एसपी जोशीले बताए।
त्यति बेला पनि उनीहरू लुकेर क्यान्टिनमा बसेर मौका छोपिरहेका थिए। तर रेडपान्डा चोर्न खोज्दा भागेर रूखमा चढेको थियो। सफल नभएपछि वैशाख ३० गते राति उनीहरू पुनः चिडियाखाना पुगेका थिए।
'उनीहरू दिउँसोपख गए। पछि अबेरसम्म बस्न शौचालयमा लुकेर बसे,' एसपी जोशीले भने, 'राति १० बजेतिर सबै सुनसान भएपछि भने उनीहरूले निस्केर चोरी गर्न खोजेका हुन्।'
उनीहरूले रेडपान्डा राखिएको ठाउँमा कसरी पस्नेबारे पनि योजना बनाइसकेका थिए। योजना अनुसार त्यस रात उनीहरूले रेडपान्डा समाएर झोलामा राख्न सकेका थिए। तर त्यहाँबाट चोरेर भाग्न सकेनन्।
झोलामा राखेपछि रेडपान्डा कराउन थालेको थियो। कर्मचारीहरूको समेत आवतजावत भएपछि रेडपान्डा राख्न बनाइएको पर्खाल बाहिर निगालोको घारीमा छाडेर दुवै जना फरार भएका हुन्।
पक्राउ परेका तफिकले प्रहरीलाई दिएको बयान अनुसार रेडपान्डालाई जिउँदै भारत लैजाने तयारी थियो।
'भारतमा पुर्याएबापत दुई लाख रूपैयाँ दिने भनिएको उनले बताएका छन्। यिनलाई मात्रै एक लाख रूपैयाँ दिने कुरा रहेछ। तर दुई लाखका लागि उनीहरूले यति ठूलो जोखिम किन लिए भन्नेबारे अनुसन्धान हुँदैछ,' एसपी जोशीले भने।
पक्राउ परेकाहरू माथि प्रहरीले ललितपुर जिल्ला अदालतबाट पाँच दिन म्याद थपेर अनुसन्धान अघि बढाएको छ।
