रौतहटमा दाउरा टिप्न गएका किशोर खोलामा बेपत्ता भएका छन्।
बुधबार माधवनारायण नगरपालिका-८ स्थित बागमती खोला किनारमा दाउरा टिप्न गएका १३ वर्षीय किशोर सुधिर पासवान बेपत्ता भएका हुन्।
जिल्ला प्रहरी कार्यालय रौतहटका इन्स्पेक्टर रूद्धराज कँडेलका अनुसार सुधिर १३ वर्षकै अर्का किशोर शिवजी पासवानसँगै दाउरा टिप्न बागमतीको किनारमा पुगेका थिए।
'एक्कासी बाढी आएर एक जनालाई बगाएपछि स्थानीयले प्रहरीलाई खबर गरेका थिए,' उनले भने, 'खबर आउनसाथ एकजना बालकलाई उद्धार गरियो। बेपत्ता भएका बालको पनि खोज्ने काम भइरहेको छ।'
एक बालक नदीको बीचमा उभिएर बसेको भिडिओ सामाजिक सञ्जालमा पनि भाइरल भएको छ।
ती बालक शिवजी रहेको र उनलाई लगत्तै उद्धार गरिएको इन्स्पेक्टर कँडेलले बताए।
बेपत्ता भएका बालक बिहीबार दिउँसोसम्म फेला परेका छैनन्।
इलाका प्रहरी कार्यालय पिपरारजबाट १ किलोमिटर आसपास खोजी भएको इन्स्पेक्टर कँडेलले बताए।
-1746009348.jpg)
