राष्ट्रिय स्वतन्त्र पार्टी (रास्वपा) ले सहमहामन्त्री विपिनकुमार आचार्यलाई रूपन्देही–३ को उपनिर्वाचन कमान्डर तोकेको छ।
बुधबार बसेको पार्टी सचिवालयको बैठकले लुम्बिनी प्रदेश इञ्चार्ज आचार्यलाई रुपन्देही निर्वाचन क्षेत्र नम्बर ३ मा हुने उपनिर्वाचनसम्बन्धी सम्पूर्ण कार्यको नेतृत्व गर्ने जिम्मेवारी प्रदान गरेको महामन्त्री कविन्द्र बुर्लाकोटीले जानकारी दिए।
सचिवालय बैठकले उम्मेदवार छनोट कार्यविधि स्वीकृत गरी केन्द्रीय समिति सदस्यहरूको रायका लागि पठाइएको पनि बताएको छ।
‘पार्टीले केही दिनभित्र कार्यविधिअनुसार उपनिर्वाचनका लागि उम्मेदवार बन्न इच्छुक व्यक्तिहरूबाट आवेदन आह्वान गर्नेछ र प्राप्त आवेदनहरूको मूल्यांकन गरी तय कार्यविधिअनुसार उम्मेदवार छनोट प्रक्रिया सञ्चालन गर्नेछ,’ बुर्लाकोटीले भने।
रूपन्देही–३ मा आगामी कात्तिक १७ गते उपनिर्वाचन हुँदैछ। रूपन्देही–३ का प्रतिनिधि सभा सदस्य दीपक बोहराको निधन भएपछि रिक्त स्थानमा उपनिर्वाचन हुन लागेको हो।
-1746009348.jpg)
