महाकुम्भ मेलाबाट फर्किँदै गरेका नेपालीहरू सवार गाडी दुर्घटना हुँदा तीन जनाको मृत्यु भएको छ।
शुक्रबार राति गोरखपुरको बासगाउँमा १० नेपाली सवार स्कारपिओ गाडी ट्याक्टरसँग ठोक्किएर दुर्घटना हुँदा तीन जनाको घटनास्थलमै मृत्यु भएको हो।
भारतीय सञ्चारमाध्यम लाइभ हिन्दुस्तान डटकमका अनुसार तीव्र गतिमा भएको गाडीले सोही दिशातर्फ जाँदै गरेको ट्याक्टरलाई ठक्कर दिएको थियो।
दुर्घटनामा परी मृत्यु हुने तीनै जना सप्तरीका हुन्।
दुई जना सप्तरीको कञ्चनरूप नगरपालिका-७ का ६४ वर्षीय परशुराम चौधरी र लिलावती चौधरी तथा सोही नगरपालिका वडा नम्बर ५ पोखरियाकी ५५ वर्षीया हरिहरदेवी यादवको घटनास्थलमै मृत्यु भएको हो।
लिलावतीका श्रीमान उपेन्द्र नारायण चौधरी गम्भीर घाइते रहेको जानकारी प्राप्त भएको वडाध्यक्ष समानन्द चौधरीले जानकारी दिए।
वडा नम्बर ५ का वडाध्यक्ष कैलाशकुमार साहले पनि हरिहरदेवीकी श्रीमान जितु यादव घाइते भएको जानकारी आएको बताए।
मृत्यु भएकाहरूका आफन्त शनिबार बिहानै गोरखपुरका लागि हिँडेको दुवै वडाध्यक्षले जानकारी दिए।
उनीहरू बुधबार कूम्भस्नानका लागि प्रयागराज गएका थिए। बिहीबार बसेर शुक्रबार समयमै फर्किएको भएपनि ट्राफिक जामका कारण ढिला भएको बताइएको छ।
गाडीमा सवार अन्य सात जना घाइते भएका छन्। उनीहरू सबैको गोरखपुर जिल्ला अस्पतालमा उपचार भइरहेको लाइभहिन्दुस्तान डटकमले जनाएको छ।
सप्तरीका प्रहरी प्रमुख एसपी ढकेन्द्र खतिवडाले दुर्घटना भएको जानकारी आएको र भारतीय पक्षसँग समन्वय भइरहेको बताएका छन्।
