नवराज सुवेदी नेतृत्वको 'संयुक्त जनआन्दोलन' समितिले आज आन्दोलन नगर्ने भएको छ।
राजसंस्था पुनर्स्थापना, हिन्दु राष्ट्र पुनर्स्थापना, संघीयता खारेजीजस्ता एजेन्डा लिएर जेठ १५ गतेदेखि समितिको आह्वानमा 'जनआन्दोलन' भइरहेको थियो।
यो पनि: राप्रपासँग समन्वय नै नगरी सुवेदीले गरेका थिए बन्द आह्वान
समितिको उक्त कार्यक्रमलाई राप्रपा, राप्रपा नेपाल, राष्ट्रिय शक्ति नेपाललगायत दल तथा समूहहरूले समर्थन जनाएका थिए भने काठमाडौंका विभिन्न स्थानमा दिनहुँ प्रदर्शन भइरहेको थियो।
समितिले राजसंस्था पुनर्स्थापनालगायत माग पूरा नभएसम्म अनिश्चितकालीन आन्दोलन गर्ने घोषणा गरेको थियो। तर आज भने राजावादीहरूले आन्दोलन शोकमा परिणत गर्ने भएका छन्। धर्ना तथा जुलुस नगर्ने उनीहरूको भनाइ छ।
संयोजक सुवेदीले विज्ञप्ति जारी गर्दै राजा वीरेन्द्रको परिवारको हत्या भएको स्मृतिमा आज शोकमा साँझ दीप प्रज्ज्वलन गरिने उल्लेख गरेका छन्।
राजा वीरेन्द्रको परिवारको २०५८ जेठ १९ गते नारायणहिटी दरबारमा हत्या भएको थियो। उक्त हत्या कसले गरेको अहिलेसम्म यकिन छैन।
राजावादीहरूले आज आन्दोलनका कार्यक्रम नगरी साँझ ६ बजे कमलादीस्थित गणेशस्थानमा दीपप्रज्ज्वलन गर्न लागेका हुन्।
राजावादीहरूको आइतबारको प्रदर्शनका क्रममा राप्रपा नेपालका अध्यक्ष कमल थापालगायत पक्राउ परेका थिए। उनलाई भेट्न पुगेका राप्रपा सांसद दीपक सिंहलाई पनि प्रहरीले नियन्त्रणमा राखेको थियो। तर उनीहरूलाई प्रहरीले आइतबार बेलुकी नै रिहा गरिसकेको छ।
यसबीच सुवेदी नेतृत्वको 'संयुक्त जनआन्दोलन समिति' ले आज काठमाडौं उपत्यका बन्द घोषणा गरेको थियो भने राप्रपाको विरोधबीच आज बिहानै उक्त कार्यक्रम फिर्ता भएको थियो।
यस्तो छ विज्ञप्ति;
-1745830949.jpeg)
