प्रधानमन्त्री केपी शर्मा ओलीले प्रमुख प्रतिपक्षी दलका नेता नेकपा (माओवादी केन्द्र) का अध्यक्ष पुष्पकमल दाहाल 'प्रचण्ड' लाई फोन गरेका छन्।
प्रधानमन्त्री ओलीले बुधबार प्रचण्डलाई फोन गरी गृहमन्त्री रमेश लेखकलाई भिजिट भिसा प्रकरणबारे सदनमा बोल्न दिन आग्रह गरेका हुन्।
प्रतिपक्षी दलहरूले प्रतिनिधि सभाको बैठक अवरोध गर्दै आएका छन्। गृहमन्त्रीले राजीनामा दिनुपर्ने उनीहरूको अडान छ।
साथै गृहमन्त्रीले सदनमा बोल्न समय माग गरे पनि गृहमन्त्रीलाई बोल्न नदिने पक्षमा प्रतिपक्षी दलहरू छन्।
यसै सन्दर्भलाई लिएर प्रधानमन्त्री ओलीले प्रचण्डलाई फोन गरेको एमालेका मुख्य सचेतक महेश बर्तौलाले जानकारी दिए।
बुधबार बिहान प्रधानमन्त्री ओली र कांग्रेसका सभापति शेरबहादुर देउवाबीच भेटवार्तासमेत भएको थियो। उक्त भेटवार्तापछि गृहमन्त्री लेखकले संसदमा बोल्ने निष्कर्ष निकालेको थियो।
सो भेटवार्तापछि प्रधानमन्त्रीले प्रचण्डलाई फोन गरेका थिए।
माओवादी केन्द्रका सांसद माधव सापकोटाका अनुसार अध्यक्ष प्रचण्डलाई प्रधानमन्त्रीको फोन आएको थियो।
प्रधानमन्त्रीलाई अध्यक्ष प्रचण्डले पहिले गृहमन्त्रीलाई राजीनामा दिन लगाउन भनेको पनि सापकोटाले जानकारी दिए।
‘गृहमन्त्रीलाई राजीनामा दिन लगाएर सदनलाई तपाईंले जानकारी गराउनुहोस्,’ अध्यक्ष प्रचण्डको भनाइ थियो।
भोलि बजेट ल्याउने विषयमा भने माओवादी केन्द्र सकारात्मक रहेको उनको भनाइ छ।
