प्रधानमन्त्रीसमेत रहेका नेकपा (एमाले) का अध्यक्ष केपी शर्मा ओली, नेपाली कांग्रेसका सभापति शेरबहादुर देउवा र गृहमन्त्री रमेश लेखकबीच बालुवाटारमा छलफल भएको छ।
बुधबार बिहान प्रधानमन्त्रीले कांग्रेस सभापति देउवा र गृहमन्त्री लेखकसँग कुराकानी गरेका हुन्।
‘प्रधानमन्त्रीज्यूले कांग्रेस सभापति र गृहमन्त्रीसँग कुराकानी गर्नुभएको छ, भेटवार्ता जारी छ,’ स्रोतले सेतोपाटीसँग भन्यो।
भिजिट भिसा प्रकरणमा प्रमुख प्रतिपक्षी नेकपा (माओवादी केन्द्र) सहित प्रतिपक्षी दलहरूले गृहमन्त्रीको राजीनामा माग गरिरहेका छन्।
प्रतिपक्षीले गृहमन्त्रीले राजीनामा नदिएसम्म सदनको नियमित प्रक्रिया अघि नबढ्ने चेतावनीसमेत दिएका छन्। जसका कारण मंगलबारको प्रतिनिधि सभा बैठक अवरोध भएको थियो।
प्रतिनिधि सभा बैठक बुधबार बिहान ११ बजेका लागि बोलाइएको छ। उक्त बैठकअघि प्रधानमन्त्रीले कांग्रेस सभापति र गृहमन्त्रीसँग कुराकानी गरेका हुन्।
