नेपाल विद्युत प्राधिकरणका निवर्तमान कार्यकारी निर्देशक हितेन्द्रदेव शाक्यले सामाजिक सञ्जाल फेशबुकमा आफ्नो जलेको घरको खरानी मुठ्ठिमा लिएको तस्विरसँगै भावुक स्टेटस् लेखेका छन्।
गत भदौ २३ र २४ गते भएको जेनजी प्रदर्शनका क्रममा उनको घर जलेको थियो।
‘किन हो आज मुटु चरक्कै चर्कियो, खुलेआम चर्कियो, त्यसैले फेसबुकमा पोस्ट्याएँ—मैले के बिराएँ?,’ उनले लेखेका छन्।
‘यसबारे उनले सञ्जालमा स्टेटस् र जलेपछिको घरको अवस्थाका तस्बिरहरू राखेका छन्।
उनले जिन्दगीभरको सफलता घर रहेको र त्यो पनि रगत/पसिनाको कमाइ भएको उल्लेख गरेका छन्।
‘८/१० हजार डलर मासिक बचाएर, झण्डै एक वर्ष जोगाएर साँचेको धनले अनि अझ त्यतिले पनि नपुग्ने भएपछि संचयकोषको ऋण लिएर मैले बनाएको यो घर, चिलिमे कम्पनीको बोनस र अलि बढी पाइने तलब बचाएर घरको ऋण तिरेको, हरेक ढलान, ढोका र प्लास्टरमा मेरो कमाइ, र मेरो श्रीमतीको खटाइ, आज यो खरानी हातमा मलाई’ उनले लेखेका छन्।
नेपालमा इमान्दार भएर जागिर खाएर बस्न साह्रै गाह्रो भएको समेत उनले उल्लेख गरेका छन्।
‘म भन्ने गर्थें श्रीमतीलाई इमानदार भएर जागिर खाएर समाजमा बस्न धेरै गाह्रो छ, यहाँ इमानदारीले घर गृहस्थ हुँदैन, अनि बेइमानी र घुसले आत्मसम्मान दिँदैन। तर, हेर त पुरा इमानदारीका साथ घर पनि र सम्मान पनि अर्जेको छु, यही हो साँचो पुरुषार्थ। मैले धेरै पटक श्रीमतीलाई सम्झाउँथे जहिले जहिले उसले मलाई अरूको धन सम्पत्ति सुनाउँथी।
तर आफ्नो पुरुषार्थ ठानेको यो घर, आज मलाई नपुंसक जस्तो गिज्याइरहेछ। स्खलित, निष्प्रभावी, नपुंसक।’
उनले सरकार र राज्यको अपराधको सजाय आफूले झेल्नु परेको पनि गुनासो गरेका छन्। र प्रश्न गरेका छन्‘ मैले के बिराएँ — यदि बिराएकै हो भने, भन ए राज्य ए सरकार, तेरो यो अपराध हो र यो तेरो सजाय। होइन, देश र मुलुकको परिवर्तनको लागि बलिदान हो भने, भनिदेऊ, यो तेरो बलिदान, म मेरो देश निम्ति शिर नै चढाउँछु सहर्ष। तर घुन पिसिएको, यो अर्थहीन खरानी, यो मलाई स्वीकार्य छैन। म जवाफ खोजिरहेछु, आफ्नै घर–सन्तानको खरानी हातमा लिएर, मैले के बिराएँ?
-1746009348.jpg)
