श्री एयरलाइन्सले अन्तर्राष्ट्रिय उडान गर्न प्रक्रिया अगाडि बढाएको छ। गएको भदौदेखि आन्तरिक उडान सुरु गरेको श्रीले नेपाल नागरिक उड्ययन प्राधिकरणसँग अनुमति माग गरेको हो।
बम्बार्डियर सिआरजे सिरिजका तीन वटा जेट विमानबाट आन्तरिक उडान गरिरहेको श्रीले क्षेत्रीय उडान गर्ने भन्दै अनुमति माग गरको श्रीका अध्यक्ष सुधिर मित्तलले जानकारी दिए।
पहिलो चरणमा क्षेत्रीय उडान गर्ने योजना बनाएको उसले भारतका विभिन्न सहरमा काठमाडौंबाट उडान गर्ने छ। सिआरजे–७०० सिरिजका ७० र ९० सिटे विमानबाट उडान गर्ने कम्पनीले जनाएको छ।
हाल एउटा ७० सिटे र दुईवटा ५० सिटे विमान भएको श्रीले आगामी दिनमा विमान थप गरेर उडान गर्ने बताएको छ।नेपालमा अहिले विदेशी एयरलाइन्सको बाहुल्यता हुँदा भाडा महँगो र सेवामा गुणस्तर नभएको भन्दै श्रीले गुणस्तरीय यात्रा सस्तोमा गराउने महात्वाकांक्षी योजना बनाएको छ।
विदेशी एयरलाइन्सको हिस्सा धेरै भएकोले नेपालबाट बाहिरिने रकम पनि धेरै भएकाले स्वदेशी कम्पनीहरुलाई प्राथमिकता दिइनुपर्ने अध्यक्ष मित्तलले बताए।
‘विदेशबाट नेपाल आउनेलाई भाडा बढेको छ, यहाँ उनीहरुको हिस्सा पनि बढी छ, स्वदेशी कम्पनीलाई प्राथमिकता दिएमा अर्थतन्त्रमै सकारात्मक योगदान पर्नेछ’ उनले भने।
नेपालमा सबभन्दा बढी हवाइमुभमेन्ट भारतसँग रहेको छ। यस्तो अवस्थामा भारतीय तीन र नेपाल एयरलाइन्सले मात्र उडान गरिरहेका छन्।
श्रीले प्राधिकरणबाट अन्तर्राष्ट्रिय उडानको अनुमति पाउन केही समय भने लाग्ने देखिन्छ। हालै मात्र उडान अनुमतिको कानूनी व्यवस्था परिमार्जन गरी खुकुलो बनाउने प्राधिकरणको तयारी छ।
अनुमति पाएपछि विमान थप गरी उडान सुरु गर्ने मित्तलले जानकारी दिए। हेलिकप्टर सेवाबाट आएको एयरलाइन्सले आन्तरिक उडान सुरु गरेको ६ महिनाभित्रै अन्तर्राष्ट्रिय उडानको लागि अनुमति माग गरेको हो।
श्रीले यसअघि नै नेपालगन्जलाई क्षेत्रीय विमानस्थल बनाएर आफूहरुलाई त्यहीबाट भारत उडान गर्ने अनुमति दिन प्रस्ताव गरेको थियो।
श्रीका अधिकारीहरुका अनुसार उक्त विमानस्थलमा आफूहरुलाई क्षेत्रीय उडानको अनुमति दिएमा छ महिनासम्म एक्लै चलाइदिने बाचा कम्पनीले गरेको थियो।
