मंगलबार सेयर बजार परिसूचक नेप्से ८०.९७ अंकले बढेर २९७३ विन्दुमा पुगेको छ। यो करिब एक वर्षयताकै उच्च बिन्दु हो।
गत वर्ष २०८१ भदौ ६ गते नेप्से परिसूचक २९७४.४६ विन्दुमा थियो। मंगलबार नेप्से त्यसयताकै उच्च विन्दुमा आएको हो।
मंगलबार कारोबार रकम पनि बढेर २० अर्ब आठ करोड रूपैयाँ पुगेको छ। सोमबार १६ अर्ब ३२ करोड रूपैयाँको कारोबार भएको छ।
मंगलबार बजार बढेसँगै सेयर लगानीकर्ताको सम्पत्ति ४९ खर्ब ६२ अर्ब रूपैयाँ पुगेको छ। यो हालसम्मकै उच्च हो।
बजारमा कारोबारमा आएका सबै समूहगत परिसूचक बढेका छन्। उत्पादनमुलक, लघुवित्त र जीवन बीमा कम्पनी समूहका समूहगत परिसूकचमा सबैभन्दा धेरैले वृद्धि भएको छ। यी समूहगत परिसूचक चार प्रतिशतभन्दा धेरैले बढेका छन्।
कारोबारमा आएका तीन सय १९ सेयर, ऋणपत्र र सामूहिक लगानी कोषका इकाइ मध्ये दुई सय ७१ को मूल्य बढेर कारोबार भएको छ। ३८ वटा कम्पनीको सेयर मूल्य घटेको छ।
ट्रेड टावर, शिवम सिमेन्ट, सान्भि जलविद्युत्को सेयर मूल्य १० प्रतिशत हाराहारी बढेर सर्किट ब्रेक लागेका छन्। उन्नती सहकार्य लघुवित्त र विन्धवासिनी हाइड्रोपावरको सेयर मूल्य पनि नौ प्रतिशतभन्दा धेरैले बढेको छ।
११ प्रतिशत ब्याज दिने लुम्बिनी बैंकको ‘ऋणपत्र ८९’ को मूल्य ३.९४ प्रतिशत र एनआइबीएल ग्रोथ फण्डको मूल्य ३.०१ प्रतिशतले घटेको छ।
नेपाल पुनर्बीमा, शिवम र हिमालयन रि इन्सुरेन्सको सबैभन्दा धेरै रकमको सेयर कारोबार भयो। यी कम्पनीहरूको ५६ करोड देखि ७१ करोेड रूपैयाँसम्मको सेयर किनबेच भयो।
-1746009348.jpg)
