दुई दिन उच्च अंकले बढेको नेप्से परिसूचक मंगलबार सामान्य अंकले मात्र बढ्यो। दिनभरको उच्च उतारचढावपछि अन्तमा बजार केही अंक उकालो लागेको थियो।
अब अहिलेको बजारले के संकेत गरिरहेको छ त?
यसलाई केही प्राविधिक विश्लेषणका औजारहरूबाट नियालौं।
सेयर बजारमा देखिने मैनबत्ती चित्रलाई अंग्रेजीमा 'क्यान्डल स्टिक' भनिन्छ।
बजारको सुरू, उच्च, न्यून र अन्तिम विन्दुको आधारमा यस्तो चित्र बन्छ भने यस्तो चित्रहरूको शृंखलाबाट बजार प्रवृत्तिको विश्लेषण गरिन्छ।
१८ औं शताब्दीमा चामलका व्यापारीले मूल्य अनुमानका लागि यो प्राविधिक विश्लेषण विकास र प्रयोग गरेका थिए। मैनबत्ती चित्र विश्लेषणबाट हेर्दा मंगलबार बजारले ‘ह्याङगिङ मेन’ आकृति बनाएको छ। दुई दिन उच्चले बजार बढेकामा तेस्रो दिन यस्तो आकृति बनेको हो।
यो आकृति कसरी चिन्ने त?
यो आकृतिमा बन्ने मैनबत्ती आकृतिको शरीर निकै सानो हुन्छ। किनभने यसको सुरू विन्दु र अन्तिम विन्दुबीचको अन्तर निकै कम हुन्छ।
बजार निकै तलसम्म ओर्लिएकाले तल्लो धागो शरीरको आकारभन्दा लगभग दोब्बर लामो हुन्छ।
अब यो चित्र कसरी बन्छ, बुझौं।
बजार उकालो प्रवृत्तिमा हुँदा बजार खुल्नासाथ बिक्री उच्च भएको हुन्छ। तर कारोबारको अन्त्यमा बजार सो दिनकै उच्च बिन्दुमा वा त्यस नजिक बन्द हुन्छ।
यसले आगामी दिनहरूमा थप बिक्री बढ्न सक्ने सम्भावना संकेत गर्छ। तर यसलाई कमजोर संकेत मानिन्छ। अर्को दिन बजार खुल्दा निकै तलबाट खुल्यो र घटेरै बन्द भयो भने बजार केही समय घट्ने सुनिश्चित गर्न सकिन्छ।
बजारमा सकारात्मक पक्ष हावी हुन थाल्यो भने बजार घट्ने संकेतले काम नगर्न सक्छ। यसै पनि मैनबत्ती चित्र छोटो अवधिको बजार प्रवृत्ति हेर्न प्रयोग गरिने विश्लेषणको औजार हो।
नेप्सेको रेखा चित्रमा अर्को संकेत पनि देखिएको छ। नेप्सेको रेखाचित्रले अंग्रेजी अक्षरको डब्लु आकृति पूर्ण गरेको छ।
असोज आठ गते २६८९ बिन्दुसम्म पुगेको नेप्सेले यसबीच दुइटा न्युन विन्दु बनाएको छ। कात्तिक ९ गते एक पटक नेप्से २४६९ सम्म पुगेर केही बढ्यो तर केही समयमै फेरि घट्यो। यसरी घट्दा २५३० बाटै बजार फर्कियो। यी दुवै न्युन विन्दु समान नभए पनि अहिले आइपुगेको विन्दुमा अंग्रेजी अक्षरको डब्लु आकृति बनेको छ।
यस्ता न्यून विन्दु समान नै हुनुपर्छ भन्ने हुँदैन।
अहिले नेप्से असोज ८ गतेको उच्च विन्दु २६८९ नजिक आइपुगेको हो।
सोमबार नेप्से परिसूचक २६५८ सम्म पुगेर बजार बन्द हुँदा २६५५ मा बन्द भयो। यो आकृतिले पूर्णता पाइरहँदा बजारले बढ्न संघर्ष गरिरहेको छ। यहाँ बजारले प्रतिरोध सामना गरिरहेको हो। यो प्रतिरोध तोडिएमा बजार थप उकालो लाग्न थाल्ने मानिन्छ।
नेप्सेको रेखाचित्रलाई ५ दिने मुभिङ एभरेज र २० दिने मुभिङ एभरेज रेखाबाट हेर्दा बजारले बुलिस प्रवृत्ति गुमाइसकेको अवस्था देखिँदैन।
अहिले पनि ५ दिने मुभिङ एभरेज २० दिने मुभिङ एभरेजभन्दा माथि छ। यदि ५ दिने मुभिङ एभरेज रेखा तल आएमा बजार केही समय घट्ने प्रवृत्तिमा जाने मानिन्छ।
५ दिने मुभिङ एभरेज र २० दिने मुभिङ एभरेज रेखा पनि छोटो अवधिको प्रवृत्ति विश्लेषणका लागि प्रयोग गरिन्छ।
मध्यमकालीन विश्लेषणका लागि भने २० दिने र ५० दिने मुभिङ एभरेज र दीर्घकालीन प्रवृत्ति विश्लेषणका लागि भने ५० दिने र २ सय दिने मुभिङ एभरेज रेखाको चाल हेर्नुपर्छ।
-1746009348.jpg)
