कान्तिपुर फर्मास्युटिकल्स ल्याब लिमिटेडको धितोपत्र प्रत्याभूतिका लागि एलिट क्यापिटल लिमिटेडले जिम्मेवारी लिएको छ।
मंगलबार एलिट क्यापिटल र कान्तिपुर फर्मास्युटिकल्सबीच यस सम्बन्धी सम्झौतामा हस्ताक्षर भएको हो।
एलिटले कान्तिपुरको १७ करोड रूपैयाँ बराबरको १७ लाख कित्ता साधारण सेयरको प्रत्याभूति गरेको हो।
यससम्बन्धी सम्झौतामा मंगलबार कान्तिपुर फर्मास्युटिकल्सका प्रबन्ध सञ्चालक नवराज पौडेल र एलिट क्यापिटलका कार्यकारी अध्यक्ष दिनेश आचार्यले हस्ताक्षर गरे।
कान्तिपुर फर्मास्युटिकल्सले आइपिओ निष्कासन गर्न नियामक निकाय नेपाल धितोपत्र बोर्डमा निवेदन दिएको छ। यसको बिक्री प्रबन्धक मुक्तिनाथ क्यापिटल रहेको छ।
६३ करोड चुक्तापुँजी भएको सो कम्पनीले अंकित मूल्य १०० रूपैयाँमा १७ लाख कित्ता आइपिओ निष्कासन गर्ने प्रक्रिया सुरू गरेको छ।
सन् २०१८ सालमा स्थापित भएको यस कम्पनीले भेटेरिनरी सम्बन्धी औषधिहरूको अनुसन्धान तथा पशुपन्छीका लागि आहारपूरक सप्लिमेन्ट उत्पादन तथा बिक्रीवितरण गरिरहेको छ।
हाल कम्पनीले औषधि व्यवस्था विभागबाट ६१ वटा औषधिहरूको उत्पादन स्वीकृति प्राप्त गरिसकेको छ।
जसमध्ये १३ वटा औषधिहरूको बिक्री वितरण प्रमाणपत्र प्राप्त गरी नेपाली बजारमा बिक्री वितरण गर्दै आइरहेको छ।
अन्य औषधिहरूको बिक्रीवितरण प्रमाणपत्र प्राप्त गर्ने प्रक्रियामा रहेको कम्पनीले जनाएको छ।
साथै कम्पनीले २१ वटा अन्य आहारपूरक सप्लिमेन्टसहरूको समेत उत्पादन तथा बिक्री वितरण गर्दै आइरहेको छ।
