गुड फ्राइडे सिनेमा
सिबिआई अफिसर अजय सिंह स्थानीय प्रहरी चौकीमा फोन गर्छन्। एक जनाको घरमा छापा मार्न लागिएकाले प्रहरीको सहयोग माग्छन्।
सब–इन्स्पेक्टर रणवीर सिंह केही बेरमै आफ्नो टिमसँग आइपुग्छन्।
उनीहरू मन्त्रीको घरमा छापा मार्न गइरहेका हुन्छन्।
अजयका सिनियर पी. के. शर्मा, सहकर्मी जोगिन्दर खुराना, इकबाल अली र रणवीरको टिमले मन्त्रीको घरमा छापा मार्छ। मन्त्रीको घरबाट लाखौं रूपैयाँ बरामद गरेर उनीहरूले लैजान्छन्।
यो सबै काम देखेर उनीहरूसँग पहिलो पटक भेटेका सब–इन्स्पेक्टर रणवीर प्रभावित हुन्छन्। वाह, क्या काम गर्छन् यिनीहरू भन्दै दंग पर्छन्।
रणवीर अलमलमै भइरहँदा दर्शकलाई भने थाहा हुन्छ, अजय र उनका साथीहरू कुनै सरकारी अधिकारी होइनन्। उनीहरू त सिपालु र चतुर ठग हुन्।
अलग अलग सहरमा विभिन्न सरकारी अधिकारी बनेर उनीहरू उच्च पदस्थ व्यक्तिहरूका घर, पसलमा छापा मार्छन्। अनि सम्पत्ति लुटेर भाग्छन्।
उनीहरूको यो ठगीबारे सार्वजनिक खबर पनि आउँदैन। किनभने उनीहरू खासगरी कालो धन लुकाएका व्यक्तिहरूकहाँ मात्र छापा मार्छन्। त्यस्तै यो घटना सन् १९८७ को भएकाले अहिलेजस्तो सञ्चार माध्यम थिएन। यो वास्तविक घटनामा आधारित कथा हो।
अजयकी प्रेमिका हुन्छिन् प्रिया चौहान। धेरै पैसा कमाएर प्रियासँग बिहे गर्ने उनको सोच हुन्छ। उता पी. के. आफ्नी छोरीको बिहेमा व्यस्त हुन्छन्।
मन्त्रीको घरमा छापा मारेपछि केही समय गुमानाम झैं बसेका अजय, जोगिन्दर र इकबाल पी. के. की छोरीको बिहेमा जान्छन्। उनीहरू नयाँ योजना बनाउन थाल्छन्।
यसबीच उनीहरू ठग थिए भन्ने थाहा भइसकेर सब–इन्स्पेक्टर रणवीर निलम्बित भइसकेका हुन्छन्। आफ्नो असफलतामा निराश भएका उनको भेट एक इमानदार सिबिआई अफिसर वसीम खानसँग हुन्छ। दुवै मिलेर अजयको टोलीलाई पक्रिने योजना बनाउँछन्।
यसपछि कथा नयाँ मोडमा प्रवेश गर्छ।
अजयले कोलकातामा व्यापारीहरूको कार्यालयमा आयकर विभागको भेषमा अर्को छापा मार्छन्। त्यो काम कठिन भए पनि सफल हुन्छ।
उनीहरूको निरन्तर खोजबिन गरिरहेका सिबिआई अधिकारी वसीमलाई थाहा हुन्छ, अजय र पी. के. अझै ठूलो योजना बनाइरहेका छन्। उनीहरू मुम्बई (तत्कालीन बम्बे) को चर्चित र ठूलो गहना पसल 'ओपरा हाउस' मा अन्तिम डकैती गर्दैछन्।
अजयहरूलाई यो काममा अन्य मानिस पनि चाहिन्छ। त्यसैले उनीहरूले सिबिआईमा नयाँ युवाहरू चाहिएको भन्दै भर्ती खुलाउँछन्। अन्तर्वार्ता लिएर उनीहरूले युवाहरू छान्छन् र 'स्पेसल २६' टिम खडा गर्छन्।
सबैलाई उनीहरूले प्रशिक्षण र अभ्यासका रूपमा छापा मार्ने भन्दै तयार गर्छन्।
अजयहरू चार जना र नयाँ युवाहरूको टोली गहना पसलमा छापा मार्न जान्छ।
उता वसीम र रणवीरको उनीहरूलाई पक्रिने योजना हुन्छ। उनीहरूले अजयको योजना थाहा पाएर पसलका सबै गहना साटेर नक्कली राखेका हुन्छन्।
अब के अजयको टोलीले डकैती सफलतापूर्वक गर्न सक्ला? वा वसीम र रणवीरले उनीहरूको योजना ध्वस्त पार्लान्? अजयहरूले झुक्क्याएर भर्ना गरेका युवाहरूको के होला?
यसका लागि हिन्दी फिल्म 'स्पेसल २६' हेर्नुहोला।
नीरज पाण्डेको निर्देशनमा बनेको यो फिल्म सन् २०१३ मा रिलिज भएको हो। यसमा अक्षय कुमार, अनुपम खेर, मनोज वाजपेयी, जिमी शेरगिल, काजल अग्रवाल लगायतको दमदार अभिनय छ। समीक्षकहरूले यसलाई वर्षकै उत्कृष्ट फिल्म भनेका थिए।
-1746009348.jpg)
