भारतीय टेलिभिजनको सबभन्दा लोकप्रिय क्विज रियालिटी शो 'कौन बनेगा करोडपति' (केबीसी) सिजन १७ केही दिनमै दर्शकमाझ आउँदैछ। यस सिजनलाई पनि अभिनेता अमिताभ बच्चनले होस्ट गर्दैछन्।
सुपरस्टार चाँडै नै आफ्नो सिटमा बसेर प्रतियोगीहरूलाई प्रश्न गरिरहेको देखिनेछन्।
यसैबीच, अमिताभले केबीसीको छायांकन सुरू गरेका छन्। आफ्नो सामाजिक सञ्जाल एक्समार्फत उनले छायांकन सेटमा पुगेको जानकारी दिएका हुन्।
अमिताभले आफ्नो पोस्टमा लेखेका छन्, 'काममा पुगियो; नयाँ दिन, नयाँ अवसर, नयाँ चुनौतीहरू। प्रणाम।'
यो अपडेटसँगै शोका फ्यानहरूमा उत्साह बढेको छ। शोको पहिलो एपिसोड ११ अगस्ट (साउन २६) मा सोनी टिभीमा प्रिमियर हुनेछ। सोमबारदेखि शुक्रबार राति ९ बजे शो प्रसारणमा आउनेछ।
अमिताभ बच्चनको अनुपम प्रस्तुति, प्रतियोगीहरूसँगको रोचक कुराकानी र जीवनका अनुभवहरूले यो शोलाई विशेष बनाउँछ। पछिल्लो समय 'कल्की २८९८ एडी' जस्तो सफल फिल्ममा देखिएका अमिताभले केबीसीमार्फत फेरि टेलिभिजनमा आफ्नो जादु देखाउनेछन्।
-1746009348.jpg)
