अहान पाण्डे र अनित पड्डा अभिनित तथा मोहित सुरी निर्देशित भारतीय फिल्म 'सैयारा' ले अभूतपूर्व सफलता पाएको छ।
यो फिल्मले विश्वव्यापी रूपमा ५ सय करोड भारूभन्दा बढीको कमाइ गरेको छ। भारतीय संचारमाध्यमका अनुसार फिल्मले प्रदर्शनको १८ दिनमै विश्वभरबाट ५ सय २ करोड ४० लाख भारू कमाएको हो।
गत जुलाइ १८ मा रिलिज भएको यो म्युजिकल रोमान्टिक फिल्मले दर्शक र समीक्षक दुवैबाट राम्रो प्रतिक्रिया पाइरहेको छ। भारतमा मात्रै फिल्मले ३ सय ८ करोड नेट कमाइ गरेको छ, जुन कुल ३ सय ७३ करोड ११ लाख भारू हुन आउँछ।
अन्तर्राष्ट्रिय बजारमा पनि फिल्मले उत्तिकै राम्रो प्रदर्शन गरेको छ। यश राज फिल्म्सको ब्यानरमा सानो बजेटमा बनेको 'सैयारा' ले ठूलो कमाइ गरेको हो। फिल्मले रिलिजको पहिलो चार दिनमै भारतमा ८५ करोडभन्दा बढीको कमाइ गरेको थियो, जसले यसलाई सन् २०२५ को सबभन्दा ठूलो ओपनिङ गर्ने फिल्ममध्ये एक बनाएको छ।
फिल्मले 'स्टुडेन्ट अफ द इयर' र 'धडक' जस्ता फिल्महरूको लाइफटाइम कलेक्सनलाई समेत पछि पारेको छ। 'सैयारा' को सफलताको श्रेय यसको भावनात्मक कथा, कर्णप्रिय संगीत, र मुख्य कलाकारहरू अहान पाण्डे र अनित पड्डाको अभिनयलाई दिइएको छ।
विशेषगरी युवा दर्शकहरूले फिल्मलाई अत्यधिक रूचाएका छन्। यो फिल्मको सफलताले नवोदित कलाकारहरूलाई पनि स्थापित गराएको छ।
-1755241369.jpg)
-1746009348.jpg)
