यही मंसिर १८ गते रिलिज हुने फिल्म 'अभिमन्युः च्याप्टर १' को हिन्दी संस्करणको टिजर रिलिज भएको छ। निर्माणपक्षले हिन्दी भर्सन हेर्ने दर्शकलाई लक्षित गर्दै मंगलबार टिजर सार्वजनिक गरेको हो।
निर्माणपक्षका अनुसार यो फिल्म नेपाली र हिन्दी दुवै भाषामा नेपाल, भारतसहित विश्वव्यापी रूपमा एकसाथ प्रदर्शनमा आउनेछ। भारतसहित ओभरसिज मार्केटलाई लक्षित गर्दै हिन्दी भर्सनको टिजर सार्वजनिक गरिएको निर्माणपक्षले जनाएको छ।
टिजरमा फिल्मका अधिकांश मुख्य कलाकारहरूलाई देख्न सकिन्छ। टिजरमा प्रेम, सस्पेन्स, पैसाको प्रलोभन, अपहरण, सेयर बाँडफाँट, प्रहरीको हिरासत पुगेको आरोपी र उसको बयान देख्न सकिन्छ।
सेभेन सिज सिनेमाको प्रस्तुति निर्माण भएको 'अभिमन्यु: च्याप्टर १' मा कामेश्वर चौरसिया, सरिता गिरी, किरण श्रेष्ठ, लक्ष्मी बर्देवा, गौमाया गुरूङ, प्रकाश दाहाल, शिशिर वाङ्देल मुख्य भूमिकामा छन्।
सुशान्त गौतम निर्देशित 'अभिमन्यु' को क्रिएटिभ निर्देशक मदन थापा हुन्। लेखन मुकेश खनालको हो।
फिल्मका निर्माता विनोद पौडेल र गुञ्जन गिरी हुन्। रमेश चौलागाईं र हरि श्रेष्ठ सह-निर्माता रहेको फिल्मको कार्यकारी निर्मातामा विशाल लामा, हरि मोक्तान, कृष्ण भट्टराई, नीराजन लुइँटेल र सन्देश श्रेष्ठ रहेका छन्।
शरद महतोको डिओपी रहेको फिल्ममा मनोज श्रेष्ठको भिएफएक्स, जुनिम गहतराजको रंग संयोजन, मदन घिमिरेको सम्पादन छ।
-1746009348.jpg)
