फिल्म 'परालको आगो' वैशाखमा प्रदर्शनमा आउने भएको छ। फिल्मको छायांकन सकिएसँगै निर्माण टिमले तीन फरक तस्बिर सार्वजनिक गर्दै प्रदर्शन मिति घोषणा गरेको हो।
यो फिल्म आगामी वैशाख ११ गतेबाट प्रदर्शनमा आउने भएको निर्माता सुशील पोखरेलले बताए। 'अरू फिल्म पनि चल्नुपर्छ भन्ने मान्यता राख्दै सामान्य मितिमा आफ्नो फिल्म रिलिज गर्ने तयारीमा छु,' उनले भने।
उनले साथीभाइलाई सम्मान गर्दै आफ्नो मितिमा फिल्म नजुधाइदिन आग्रह समेत गरेका छन्। उनले थपे, 'एकैचोटि धेरै फिल्म हलमा लाग्दा निर्माता तथा हल व्यवसायीहरूको पनि धेरै नोक्सानी हुन्छ। 'ग्याप' मा आउँदा निर्माता र हल दुवै पक्षलाई फाइदा होस् भन्ने सोचले सबै मुख्य मिति (मेजर डेट) छोडेर वैशाख ११ गते शुक्रबारको सामान्य मिति तय गरेको हुँ।'
दसैंअघि म्याग्दीका विभिन्न स्थानबाट सुरू गरेको छायांकन मंगलबार ४० दिनमा सकिएको हो। निर्माता पोखरेलले फिल्मका चार वटा गीतसहित सम्पूर्ण छायांकन पूरा भएको जानकारी दिए। 'जेनजी आन्दोलन' चलिरहेको समयमा फिल्मको छायांकनमा केही अवरोध भए पनि प्राविधिक तथा निर्देशकको खटाइले काम चाँडो सकिएको उनले बताए।
उनका अनुसार फिल्मको छायांकन तालिका ३० दिनको थियो। तर, जेनजी आन्दोलन, वर्षा र पहिरोका कारण कलाकार तथा प्राविधिकहरू अहोरात्र खट्दा पनि तालिकाभन्दा १० दिन ढिला छायांकन सकिएको निर्माता पोखरेलले जानकारी दिए।
'नेपाली माटोको सुगन्ध आउने फिल्मलाई ठूलो क्यानभासमा खिचेका छौं,' पोखरेलले भने, 'काम एकदमै उम्दा भएको छ। सौगात मल्ल, प्रकाश सपुत, सुहाना थापादेखि बालकलाकार एन्जिला बानियाँसम्मले एकदमै राम्रो काम गर्नुभएको छ।' साथै, करिब ६०० जना जुनियर कलाकार (आर्टिस्ट) प्रयोग गरेर कठिन परिस्थितिमा पनि फिल्मको राम्रो लोकेसन र कथाको मर्मअनुसार नै काम गरिएको उनले बताए।
उनले थपे, 'अहिलेको समयमा कन्टेन्ट (विषयवस्तु) नै बलियो हुनुपर्छ। हाम्रो कन्टेन्ट बलियो छ र राम्रो फिल्म बनाउने कोसिस गरेका छौं फिल्मका लागि कुनै पनि कुरामा सम्झौता गरेका छैनौं।'
गुरूप्रसाद मैनालीको चर्चित कथामा निर्माण गरिएको यो फिल्ममा सौगात मल्ल, प्रकाश सपुत, सुहाना थापा, सिर्जना अधिकारी, शंकर आचार्य, किशोर भण्डारी, कुलदीप अधिकारी, सरिता भण्डारी, रेणु न्यौपानेका साथै बालकलाकार एन्जिला बानियाँको अभिनय छ।
सुशील देवकोटाको लेखन रहेको यो फिल्मको निर्देशन लक्ष्मण सुनारले गरेका हुन्। फिल्मका गीत सुरेन्द्र राना, मनबहादुर मुखिया र प्रकाश सपुतले लेखेका छन्। त्यस्तै, संगीत शान्ति ठटाल, सत्य–स्वरूप आचार्य र प्रकाश सपुतको रहेको निर्माण पक्षले जानकारी दिएको छ।
फिल्मलाई संकल्प भुजेलले खिचेका हुन्। यो फिल्मको वितरण आर.आर फिल्म्सले गर्नेछ।
गुरूप्रसाद मैनालीको 'नासो' कथासंग्रहमा समावेश कथा 'परालको आगो' मा आधारित भएर ४५ वर्षअघि प्रताप सुब्बाले पनि फिल्म निर्देशन गरेका थिए, जुन फिल्म सफल भएको थियो।
-1763886130.jpeg)
-1746009348.jpg)
