लामो समयको अन्तरालमा हलमा आउने अभिनेतामध्ये पर्छन् अनमोल केसी। यस पटक उनी झन्डै डेढ वर्षपछि नयाँ फिल्मका साथ दर्शकमाझ आउँदैछन्।
उनी अभिनीत फिल्म 'जेरी अन टप' यही शुक्रबार (असोज ३१) देखि प्रदर्शनमा आउँदैछ।
यसअघि उनको फिल्म 'फर्की फर्की' गत वर्ष (२०८१) को जेठमा प्रदर्शनमा आएको थियो। उक्त फिल्म रिलिजको १६ महिनापछि अनमोल हलमा आउन लागेकाले पनि 'जेरी अन टप' लाई थप चासोका साथ हेरिएको छ। फिल्मको टिजर र ट्रेलर लगायतका प्रचार सामाग्रीले पनि दर्शकको ध्यान तानेको छ।
यो फिल्म प्रदर्शन हुन तीन दिन बाँकी रहँदा मल्टिप्लेक्स हलहरूले अग्रिम टिकट बुकिङ खुलाउन सुरू गरेका छन्।
देशको दोस्रो ठूलो मल्टिप्लेक्स चेन आईएनआईले फिल्मको अग्रिम टिकट बुकिङ खुलाइसकेको छ। आईएनआईको चेनमा फिल्मले कुल २० शो पाएको छ। एफक्युब सिनेमाले पनि सोमबार साँझ नै यो फिल्मको बुकिङ खुलाइसकेको छ। एफक्युबले फिल्मका लागि ७ शो उपलब्ध गराएको छ।
वान सिनेमाजले पनि बुकिङ खुलाएको छ। यहाँ फिल्मले १२ शो पाएको छ। बिग मुभिजमा पनि फिल्मको टिकट बुकिङ खुला भइसकेको छ।
देशको सबैभन्दा ठूलो मल्टिप्लेक्स चेन क्युएफएक्सले भने मंगलबार दिउँसोसम्म बुकिङ खुलाएको छैन। यहाँ बेलुकासम्ममा बुकिङ खुलाउने तयारी रहेको बुझिएको छ।
फिल्मका वितरक करण श्रेष्ठले बुधबार बेलुकासम्म देशभरका सबै हलमा बुकिङ खुलिसक्ने बताए। बुकिङ खुला भएका हलमा सुरुवाती प्रभाव राम्रो रहेकाले अन्य हलहरूमा पनि त्यसको प्रभाव देखिने विश्वास उनले व्यक्त गरे।
सुयोग गुरूङको निर्देशनमा तयार 'जेरी अन टप' मा अनमोलको अपोजिटमा अभिनेत्रीद्वय आँचल शर्मा र जसिता गुरूङ छन्। साथमा भुवन केसी, केदार घिमिरे, उषा खड्गी, सुरक्षा पन्तलगायत कलाकारहरूको अभिनय छ।
'अनन्या फिल्मस्' को ब्यानरमा तयार 'जेरी अन टप' सरोज न्यौपानेले निर्माण गरेका हुन्। दुलिप रेग्मीको सिनेमाटोग्राफी रहेको फिल्म निर्माणमा न्यौपानेसँगै रोविन शेरचन, रामकृष्ण श्रेष्ठ, दीपक भण्डारी र भविष्य खड्काले साझेदारी गरेका छन्। फिल्मको कथा हेमराज बिसीको हो।
फिल्मलाई ड्रामा, रोमान्स र एड्भेन्चर जनरामा राखिएको छ।
1635339834.jpeg)
-1756794700.JPG)
-1746009348.jpg)
