वरिष्ठ अभिनेता हरिवंश आचार्यको मुख्य अभिनय रहेको फिल्म 'हरिबहादुरको जुत्ता' सेन्सर पास भएको छ।
यस वर्षको प्रतीक्षितमध्ये मानिएको 'हरिबहादुरको जुत्ता' लाई केन्द्रीय चलचित्र जाँच समिति (सेन्सर बोर्ड) ले युनिभर्सल सर्टिफिकेट दिएको छ। योसँगै अब फिल्म हरेक उमेर समूहका दर्शकहरूले हेर्न पाउनेछन्।
सेन्सर बोर्डले दिएको प्रमाणपत्रमा उल्लेख भएअनुसार, यो फिल्मको समय (रनटाइम) २ घण्टा २१ मिनेट तय छ। बडादसैंको फूलपातीमा रिलिज हुन लागेको सामाजिक–कमेडी कथानक 'हरिबहादुरको जुत्ता' दीपेन्द्र के. खनालको निर्देशनमा बनेको हो।
फिल्ममा हरिवंशसहित स्वस्तिमा खड्का, प्रकाश सपुत, प्रियंका कार्की, हरिहर शर्मा, दिव्य देव, किरण केसी, राजाराम पौडेल, दिनेश काफ्ले, सिता न्यौपाने, कमलमणि नेपाललगायत कलाकारहरूको अभिनय छ।
नेपाली टेलिभिजनमा सर्वाधिक सफल मानिएको 'हरिबहादुर' पात्रमाथि रहेर 'हरिबहादुरको जुत्ता' बनेको हो। यसमा 'हरिबहादुर' को जीवनमा आउने उतारचढावका साथै युवापुस्ताले खोजेको राजनीतिक परिवर्तन र त्यसबाट उत्पन्न हुने परिस्थितिलाई पनि देखाइएको छ।
फिल्मको निर्माता सरोज ओली (पून्यप्रसाद ओली) र मोहितबंश आचार्य हुन्।
-1746009348.jpg)
