दिनेश राउतको निर्देशनमा फिल्म 'कुमारी' निर्माण हुने भएको छ। काठमाडौंको टुँडिखेलमा शुक्रबार साँझ एक भव्य कार्यक्रमकाबीच पोस्टर सार्वजनिक गर्दै फिल्म निर्माणको औपचारिक घोषणा गरिएको हो।
सोही कार्यक्रममा मुख्य कलाकारको रूपमा अभिषेक खड्का र आकृति राजभण्डारीलाई प्रस्तुत गरियो। अभिषेकले यसअघि फिल्म 'बेहुली फ्रम मेघौली' मा सानो भूमिकामा अभिनय गरेका थिए भने नाटक 'सिक रूम' बाट राम्रो तारिफ पाएका थिए। त्यस्तै, आकृतिले सुशान्त केसीको 'बार्दली' लगायत अन्य केही गीतको भिडिओबाट दर्शकको मन जितेकी थिइन्।
घोषणा कार्यक्रममा गायक केहर सिंह लिम्बु र उनको ब्यान्ड 'केहर एन्ड द लुंगा' को प्रस्तुतिले थप रौनक थपेको थियो।
'आइ एम सरी' बाट निर्देशन सुरू गरेका राउत, 'नोभेम्बर रेन' र 'क्लासिक' जस्ता प्रेमकथामा आधारित फिल्मका लागि चिनिन्छन्। यद्यपि, उनले हालसालै 'पर्व', 'महाभोज', 'प्रसाद', 'प्रकाश' र 'पुजार सार्की' जस्ता सामाजिक विषयवस्तुमा आधारित फिल्म पनि निर्देशन गरेका छन्।
दर्शकको चाहनाअनुसार आफू फेरि प्रेमकथामा फर्किएको उनले बताए। निर्देशक राउतले 'कुमारी' को निर्माण 'पुजार सार्की' फिल्मभन्दा अगाडि नै थालेका थिए, तर विविध कारणले अहिले छायांकनमा जान लागेको हो।
'कुमारी' को निर्माण बिनिश इन्टरटेन्मेन्टले गरिरहेको छ भने पिक्चर फ्रेमको सहकार्य रहनेछ। यसका निर्माता महेन्द्र अधिकारी हुन् भने कथा विकास सुवेदीले लेखेका छन्।
फिल्ममा अभिषेक र आकृतिबाहेक घनश्याम जोशी, सुनिता श्रेष्ठ, आकांक्षा कार्की, मधु खड्का, सनम श्रेष्ठ, सकु शाह, सरोज लामिछाने, मनिषा शर्मा, भूपी लुहारलगायत कलाकारहरूको पनि अभिनय रहनेछ। फिल्मको संगीत केहर सिंह लिम्बु, सुमन तामाङ र प्रशान्त सिवाकोटीले गर्नेछन्। केहरले सबै गीतमा स्वर दिनेछन्। गीतका शब्द सागर लामिछाने मगर, सुमन तामाङ र युवराज काफ्लेले लेखेका छन्। सार्वजनिक पोस्टर डिजाइन रोयल भिमसेन (ट्राइडेन्ट कन्सेप्ट)ले र पोस्टर फोटोग्राफी राजभाई सुवालले गरेका हुन्।
फिल्मको छायांकन यसै हप्तादेखि काठमाडौंमा सुरू हुँदैछ। 'कुमारी' को डिजिटल वितरण केन्द्र मोशन पिक्चर्सले गर्नेछ भने काठमाडौं उपत्यकामा डीसीएन र उपत्यकाबाहिर कुवेर सिने डिस्ट्रीब्युशनले थिएट्रिकल वितरण सम्हाल्नेछन्।
सुसन प्रजापतिको छायांकन निर्देशन रहने फिल्ममा कार्यकारी निर्मातामा केदार भुसाल, प्रोडक्सन डिजाइनरमा आशिका शर्मा, मुख्य सहायक निर्देशकमा दिनेश बहादुर रावत रहेका छन्।
-1746009348.jpg)
