दसैंको फूलपातीमा प्रदर्शनमा आउन लागेको फिल्म 'माइतीघर' ले आफ्नो शीर्ष (शीर्षक) गीतको छायांकनमा ठूलो खर्च गरेको बताएको छ।
निर्माता रोहित अधिकारीको दाबी अनुसार, 'बसन्त नै बस्न खोज्छ यहाँ लोलाएर' गीतको भिडिओ ११ दिन लगाएर खिचिएको र त्यसमा ५० लाख रूपैयाँ खर्च भएको हो।
ऐतिहासिक महत्व बोकेको गीत भएकाले भिडिओ निर्माणमा कुनै सम्झौता नगरिएको उनले बताए।
उनले भने, '७० जनाभन्दा बढी कोरस डान्सरसहित १ सय ५० जनाको टिम थियो। ७/८ वटा बस प्रयोग गरिएको थियो। हरेक दिन ४ देखि ५ लाख रूपैयाँ खर्च भयो।'
उसो त सुरूमा यो गीत चार दिनमा खिच्ने योजना थियो। १५/२० लाख रूपैयाँ बजेट छुट्याइएको थियो।
'तर यसअघि बाग्लुङमा खिचिएका दृश्य चित्त नबुझेपछि सबै नयाँ शैलीमा गीतको पुनः छायांकन गर्यौं। कतिपय खोजेको जस्तो दृश्य नपाउँदा एउटै दृश्यका लागि बिहानदेखि बेलुकासम्म पनि कुरेर खिचेका छौं। यसरी लगानी हवात्तै बढ्यो,' अधिकारीले भने।
कविराज गहतराजको कोरियोग्राफीमा तयार भएको भिडिओ नेपालका प्राकृतिक सौन्दर्यले भरिपूर्ण रमणीय ठाउँहरूमा खिचिएको छ। भिडिओमा मुख्य कलाकार उपासना सिंह ठकुरी र श्यामाश्री शेर्पाका साथमा कोरसको जम्बो टोलीले नृत्य हेर्न सकिनेछ।
भारतीय गायिका सञ्जीवनीको स्वर रहेको यो गीतको भिडिओ आउँदो साता सार्वजनिक गर्ने तयारी छ।
यसैबीच, निर्माण पक्षले दर्शकका लागि एक आकर्षक योजना पनि अघि सारेको छ। यो गीत सार्वजनिक भएपछि यसमा ४० सेकेन्डदेखि २ मिनेटसम्मको भिडिओ बनाउनेमध्ये एक जना उत्कृष्टलाई ५ लाख रूपैयाँ पुरस्कार दिने घोषणा गरिएको छ।
रोहित अधिकारी फिल्मस्को ब्यानरमा बनेको 'माइतीघर' मा मिलन तामाङको निर्देशन छ। फिल्ममा केदार प्रसाद घिमिरे, प्रकाश सपुत, धिरज मगर, उपासना सिंह ठकुरी, श्यामाश्री शेर्पा, युवराज लामा, बुद्धि तामाङ, शिशिर वाङ्देल, रजनी गुरूङ, सन्तोष शाहीलगायत कलाकारहरूको अभिनय छ।
रविन शेरचन र धिरज तामाङको लगानी रहेको फिल्मका कार्यकारी निर्माता ईश्वर श्रेष्ठ र निरज कटुवाल हुन् । त्यस्तै, यसको कथा चन्द्रकुमार दोङको हो भने पटकथा तथा संवाद रामशरण पाठकले तयार पारेका हुन्। डीओपी सुशन प्रजापतिको छ भने सुरेन्द्र पौडेलले सम्पादन गरिरहेका छन्।
फिल्म असोज १३ गतेबाट प्रदर्शनमा आउनेछ।
-1746009348.jpg)
