दयाहाङ राई र रिश्मा गुरूङ अभिनीत फिल्म 'रिमै' को टिजर सार्वजनिक भएको छ।
पूर्वनिर्धारित प्रदर्शन मिति हेरफेर गर्दै निर्माण टिमले मंगलबार टिजर दर्शकमाझ ल्याएको हो। यसअघि भदौ २७ गतेलाई रिलिज तोकिएको फिल्म अब भदौ २० गतेबाट देशव्यापी प्रदर्शनमा आउनेछ।
फिल्मको सार्वजनिक टिजरअनुसार फिल्मले ग्रामीण परिवेशको कथा प्रस्तुत गर्नेछ। सामाजिक कथामा बनेको फिल्मले गुरूङ संस्कृतिलाई विशेष रूपमा प्रस्तुत गरेको टिजरबाट आँकलन गर्न सकिन्छ। प्रेम, पीडा र बदला मिसिएको कथावस्तु टिजरमा देखिन्छ। दयाहाङ राईको गम्भीर भूमिका, रिश्मा गुरूङको आत्मीय उपस्थिति, अर्पण थापाको रहस्यमय चरित्र र बुद्धि तामाङको गहिरो अभिनयले दर्शकको ध्यान खिच्ने देखिन्छ।
'जारी', 'कबड्डी कबड्डी' र 'मनसरा' जस्ता फिल्मका लेखक उपेन्द्र सुब्बाको लेखन रहेको ‘रिमै’ लाई खिल बहादुर गुरूङले निर्देशन गरेका छन्।
फिल्ममा दयाहाङ र रिश्मासहित अर्पण थापा, गौमाया गुरूङ, कविता आले मगर, माओत्से गुरुङ, बुद्धि तामाङ, पुस्कर गुरूङ, वीरमाया गुरूङ, वीरवल घले, डिवी गुरूङ, टेक गुरूङ र बालकलाकार असिम सुब्बा, प्रेस्टु गुरूङ र प्रश्ना राना मगर लगायतको अभिनय छ।
गोरखा सिरानचोक एण्ड लिगलिगकोट फिल्म्स् प्रा.लि.को प्रस्तुति र रोटेपिङ इन्टरटेन्मेन्टको सहकार्यमा निर्माण भएको फिल्मको निर्मातामा टिका गुरूङ, जित यात्री गुरूङ र दुन बहादुर घले छन्। त्यस्तै वीरवल घले कार्यकारी निर्माता तथा बिनु गुरूङ, रोशन भट्टराई र राजेश घिमिरे सह–निर्माता हुन्।
शैलेन्द्र ध्वज कार्कीले छायांकन रहेको फिल्ममा दीपक शर्मा र थानेश्वर गौतमको संगीत, किरण चाम्लिङ राईको मुख्य सहायक निर्देशन र मित्र डि. गुरूङको सम्पादन छ।
-1746009348.jpg)
