अभिनेता दयाहाङ राई र प्रकाश सपुतले फिल्ममा पहिलो पटक एकसाथ काम गर्ने भएका छन्।
निर्माण तयारीमा रहेको फिल्म 'मिरमिरे' मा दर्शकले रूचाएका यी दुई अभिनेता एकसाथ देखिन लागेका हुन्।
निर्माण टिमले अभिनेता दयाहाङ राईपछि प्रकाशलाई पनि अनुबन्ध गरेसँगै दुईको सहकार्य तय भएको हो।
प्रकाश गायक पनि भएकाले यो फिल्ममा अभिनेताका रूपमा मात्रै रहनेछन् वा सांगीतिक पाटोमा पनि जोडिनेछन् भन्नेबारे खुलाइएको छैन।
अन्य कलाकारबारे पनि हालसम्म निर्माण टिमले जानकारी दिएको छैन।
निर्देशक यम शेर्पाले भने, 'हामी कलाकारसँग सम्झौताकै क्रममा छौं। केहीसँग कुरा भइरहेको छ।'
उनका अनुसार अन्य कलाकार पनि बजारले रूचाएका र अभिनयमा पक्कड भएकालाई नै लिने तयारी छ।
'मिरमिरे' यमको दोस्रो निर्देशन हुनेछ। फिल्म 'कार्साङ' फेम्ड निर्देशक यमले 'मिरमिरे' को कलाकार लाइनअप बलियो हुने बताए।
प्राविधिकपक्षमा पनि फिल्म बलियो हुने उनको भनाइ छ।
अभिनेता प्रकाश सपुतले 'मिरमिरे' मा जोडिन पाउँदा खुसी व्यक्त गरे। आफ्नो भूमिका विशेष र महत्वपूर्ण रहेको बताउँदै उनले फिल्मले आफूलाई नयाँ उचाइ दिने विश्वास व्यक्त गरेका छन्।
यार्सा फिल्म्सको प्रस्तुति रहने फिल्मले ग्रामीण परिवेशको सामाजिक कथा भन्ने यमले जानकारी दिए। फिल्मको निर्देशन सँगै स्टोरी पनि यम शेर्पा स्वयंले लेखेका छन्।
निमु शेर्पा, छोङ्बा लामा शेर्पा र आङ्छिरिङ शेर्पा निर्माता रहेको 'मिरमिरे' का सह–निर्मातामा गोविन्द बोहरा र ईश्वर श्रेष्ठ छन्। कार्यकारी निर्मातामा आरआर फिल्मसका सञ्चालक समेत रहेका फिल्म वितरक रोहित कट्टेल रहेका छन्।
फिल्मलाई २०८२ मा रिलिज गरिने बताइएको छ। प्रदर्शन मिति भने तय छैन।
