यही जेठ २३ गतेदेखि नेपालभरका हलमा प्रदर्शनको तयारीमा रहेको फिल्म 'जन्ते बाख्रो' टिमले प्रचारमा फरक शैली अपनाइरहेको छ।
यसअघि देशभरका ठूला सहरहरूमा चल्ने साना सवारी साधन टेम्पोमा पोस्टर टाँसेर दर्शकलाई आकर्षित गरेको टिमले शनिबार राजधानीमा फरक शैलीको फिल्म प्रचारको कार्यक्रम आयोजना गरेको थियो।
फिल्मको टिमले प्रचारका लागि शबिनार सिटी स्क्वायर मलको प्राङ्गणमा 'जन्ते बाख्रो साँझ' कार्यक्रम गरेको छ।
अभिनेत्री गरिमा शर्मालाई दुलहीको भेषमा बग्गीमा राखेर सामाखुसीस्थित बिजी मलबाट कार्यक्रमस्थलसम्म पन्चेबाजासहित पुर्याइएको थियो।
'जन्ते बाख्रो साँझ' मा फिल्ममा समावेश गीतका गायक/गायिकाहरू महेश काफ्ले, अस्मिता अधिकारी, बाबुल गिरी लगायतले गायन प्रस्तुतिले दर्शकलाई झुमाएका थिए।
त्यहाँ फिल्मका मुख्य कलाकार गरिमासहित आसिफ शाह, विशाल पहारी, कमल देवकोटा, लोकेन्द्र लेखक, समापिका गौतम, निर्देशक सिमोर सुनुवार, लेखक प्रदिप भारद्वाज र निर्माता सन्तोष गौतम लगायतको उपस्थिति थियो।
यस प्रकारका प्रचारात्मक कार्यक्रमले फिल्मसँग दर्शकलाई प्रत्यक्ष जोड्न सघाउने भएकाले पनि आयोजना गरिएको निर्देशक सुनुवारले बताए।
अहिले गाउँघरबाट हराउँदै गएको भुइँमा लहरै बसेका जन्तीलाई टपरी र दुनामा भोज खुवाउने परम्परा, ग्रामीण क्षेत्रको मौलिक चालचलनलाई समेटेर तयार गरिएको 'जन्ते बाख्रो' मा परम्परालाई रमाइलो ढंगले प्रस्तुत गरेकाले नयाँ पुस्ताका लागि मनोरञ्जनसहति जानकारी प्राप्त हुनेमा निर्माण पक्ष विश्वस्त छ।
मुईन इन्टरटेनमेन्टद्वारा निर्मित यो फिल्मको निर्माता सन्तोष गौतम हुन्। कथा प्रदीप भारद्वाजले लेखेका हुन् भने फिल्ममा हरि हुमागाईंको छायांकन निर्देशन, उत्तम हुमागाईंको छायांकन र सुनिल शिवभक्तिको सम्पादन छ।
