नवीन सुब्बा निर्देशित फिल्म 'गाउँ आएको बाटो' बेलायतमा प्रदर्शन हुने भएको छ।
फिल्मको वितरण अधिकार बेलायतको वितरण कम्पनी 'अन्डरग्राउन्ड स्लेट' ले किनेको हो। 'अन्डरग्राउन्ड स्लेट' ले एक वक्तव्य जारी गर्दै दुई वर्षका लागि वितरण अधिकार किनेको जनाएको छ।
यो फिल्म जुलाई पहिलो सातादेखि बेलायतको ४० भन्दा बढी हलमा प्रदर्शन हुनेछ। अन्डरग्राउन्ड स्लेटका सह-संस्थापकले ग्याब्रिएल वेट्जले निर्देशक नवीन सुब्बाको फिल्म प्रदर्शनको लागि सहकार्य गर्न पाउँदा उत्साहित रहेको बताएका छन्। विज्ञप्तिमा उनले भनेका छन्, 'क्षमतावान नेपाली फिल्ममेकर नवीन सुब्बासँग सहकार्य गर्न पाउँदा अत्यन्त उत्साहित छौं।'
निर्देशक सुब्बाले नेपाली फिल्मलाई अझै पनि विश्वस्तर दर्शकमाझ प्रर्याप्त रूपमा प्रदर्शन गर्न नसकेको बताए। 'नेपाली फिल्म अझै पनि विश्वस्तरमा पर्याप्त रूपमा प्रदर्शन हुन सकेको छैन। त्यसैले यस्तो अन्तर्राष्ट्रिय सहकार्य महत्वपूर्ण छ। अन्डरग्राउन्ड स्लेटले सीमान्तको कथा मेनस्ट्रीमको लागि योग्य ठानेर मेरो विश्वासलाई सेयर गरेको छ। यो फिल्मले नेपाली लेन्समार्फत विश्वव्यापी विषयलाई चित्रित गर्छ। सांस्कृतिक गहिराइ र रचनात्मक जोखिमलाई महत्त्व दिने टिममार्फत बेलायती दर्शकमाझ देखाउन पाउँदा उत्साहित छु,' उनले भनेका छन्।
बेलायतका लागि नेपाली राजदूत चन्द्र घिमिरेले नेपाली कथा र सांस्कृति बोकेको फिल्म बेलायती दर्शकलाई देखाउँदा दुई देशबीचको सम्बन्ध थप बलियो बनाउने बताए।
फिल्मका निर्माता अमोद राईले नेपाली कला र संस्कृतिलाई विश्वमञ्च पुर्याउन सधैँ लागि परिरहेको बताए। निर्माता राईले फिल्मलाई अस्ट्रेलिया र इटालीमा प्रदर्शन लागि वितरण कम्पनीसँग सम्झौता गरिसकेको बताए। यसअघि 'गाउँ आएको बाटो' हङकङ र थाइल्यान्ड बक्स अफिसमा समेत रिलिज भइसकेको छ।
फिल्ममा दयाहाङ राई, पशुपति राई र प्रसन राईको मुख्य भूमिका छ। फिल्मले गाउँमा पुगेको सडकले एउटा परिवारमा ल्याएको परिर्वतन र त्यसले निम्त्याएको चुनौती चित्रण गर्छ।
