फिल्म 'एक्टरः टेक वन' को गीत 'के भरोसा गरम' सार्वजनिक गरिएको छ।
यो गीतको भिडिओमा फिल्मका मुख्य कलाकार अभिनेता प्रदीप खड्कालाई दुई अभिनेत्रीहरू आना शर्मा र दिव्या रायमाझीसँग प्रेममा रहेको देखाइएको छ। गीतमा त्रिकोणात्मक प्रेमकथा देखाइएको छ। प्रदीप अभिनेत्री आनासँगको दृश्यमा बोल्न सक्ने र दिव्यासँगको दृश्यमा बोल्न नसक्ने भूमिकाका देखिएका छन्।
गीतमा हर्कुलस बस्नेत र इन्दिरा जोशीले स्वर दिएका छन् भने उर्मिला गुरूङको शब्द र हर्कुलस बस्नेतको संगीत छ। भिडिओलाई किरण थापाले कोरियोग्राफी गरेका हुन्।
राजन भुसालको निर्देशनमा बनेको यो फिल्मको स्क्रिप्ट आकाश बराल र राजन भुसालको सहकार्यमा तयार गरिएको हो। फिल्ममा प्रदीप, आना र दिव्यासहित राजबल्लभ कोइराला, दिव्य देव, उषा रजक, सृजना अधिकारी, र सुशील सिटौला लगायत कलाकारहरूको अभिनय छ।
'एक्टरः टेक वन' अदृत फिल्म्स् र मोती फिल्मको संयुक्त प्रस्तुति हो। यसका निर्माता थमन कुमार भण्डारी हुन्। क्रियटिभ निर्माता मोती कार्की र सह–निर्माता अनिश भुसाल छन्। फिल्म छायांकन नरेन्द्र मैनालीले गरेका हुन् भने सम्पादन निमेष श्रेष्ठको छ।
फिल्म माघ १६ गते रिलिज हुनेछ।
