प्रधानमन्त्री कप काठमाडौं जिल्ला छनोट क्रिकेट प्रतियोगिताको उपाधि क्रिकेट एक्सिलेन्स सेन्टर (सिइसी) ले जितेको छ।
आइतबार माथिल्लो मुलपानी मैदानमा भएको उपाधि भिडन्तमा ग्रेट हिमालयन क्रिकेट एकेडेमीलाई १०७ रनको फराकिलो अन्तरले पराजित गर्दै सिइसी च्याम्पियन बनेको हो।
सिइसीले दिएको २६२ रनको लक्ष्य पछ्याएको ग्रेट हिमालयन २६.५ ओभरमा १५४ रनमा अलआउट भयो। उसका लागि इशान पाण्डेले ८६ बलमा नटआउट १०७ रनको शतकीय पारी खेले पनि जितका लागि पर्याप्त हुन सकेन।
बलिङमा सिइसीका पृथु बाँस्कोटा, विवेकानन्द सहनी र दयानन्द मन्डलले २-२ विकेट लिए।
त्यसअघि पहिले ब्याटिङ गरेको सिइसीले कप्तान रित गौतमको शतकको मदतमा ५० ओभरमा ९ विकेट गुमाउँदै २६१ रन जोड्यो।
रितले १२९ बलमा ११३ रन जोडेका थिए। यस्तै वीरेन्द्र धनाडीले ६७ रन र पृथु बाँकस्टाले ४१ रन बनाए।
बलिङमा ग्रेट हिमालयनका इशान पाण्डेले ४ र किरण बुढा मगरले ३ विकेट लिए।
फाइनल खेलको प्लेयर अफ दि म्याच सिइसीका रित गौतम भए। महावीर क्लबका सोनु देवकोटा प्रतियोगिताको उत्कृष्ट ब्याटर र न्यु भिजन क्लबका मनसुन सिंह उत्कृष्ट बलर घोषित भए। दुवैले ५-५ हजार रुपैयाँ पुरस्कार पाए। प्रतियोगिताको उत्कृष्ट खेलाडी ग्रेट हिमालयनका इशान पाण्डे भए। उनले १० हजार रूपैयाँ प्राप्त गरे। यस्तै इमर्जिङ खेलाडी सिइसीका युगान्त कार्की भए। उनले ५ हजार रुपैयाँ प्राप्त गरे।
प्रतियोगितामा १४ टोलीले प्रतिस्पर्धा गरेका थिए। प्रतियोगिताको मुख्य प्रायोजक कृषि विकास बैंक रहेको थियो। अन्य प्रायोजकहरूमा कागेश्वरी मनोहरा नगरपालिका, सक्कल एग्रो फर्म, फ्रान्कलिन एजुकेशन कन्सल्टेन्सी, गोकर्णेश्वर नगरपालिका, नेवा बेभरेज प्रा.लि., एभरेस्ट बैंक लि., आविष्कार ज्वेलर्स, शुशील कोइराला फाउन्डेसन, नेप्लाई, नेक्सस एजुकेशन कन्सल्टेन्सी, श्रेष्ठ टेलरिङ, इको प्यानल र आइसीएफसी फाइनान्स थिए।
