नेपाल प्रहरीले विभिन्न राइड सेयरिङ एपमार्फत यात्रुहरूसँग बार्गेनिङ गरे ट्राफिक प्रहरीलाई सम्पर्क गर्न अनुरोध गरेको छ।
सोमबार यातायात व्यवसायीको आन्दोलनका कारण राइड सेयरिङ एपमा चाप बढेपछि राइडरहरूले अफलाइन बार्गेनिङ गरेको र चर्को रकम असुलेको गुनासो बढेपछि प्रहरीले सूचना जारी गरेको छ।
प्रहरी प्रधान कार्यालयले सूचना जारी गरी यस्तो क्रियाकलाप भए ट्राफिक प्रहरीको १०३ मा सम्पर्क गर्न यात्रुहरूलाई अनुरोध गरेको छ।
प्रहरीले राइडरहरूलाई पनि त्यस्तो कार्य नगर्न अनुरोध गरेको छ।
राइड सेयरिङ एप पठाओले पनि सामाजिक सञ्जालमार्फत सूचना जारी गर्दै आफूहरूले भाडा नबढाएको र अफलाइन राइड गर्नेदेखि सचेत रहन अनुरोध गरेको छ।
‘हामी प्रष्ट पार्न चाहन्छौं कि हामिले नियमित शुल्क मात्रै लिएका छौँ तसर्थ पठाओ एपमा कुनै पनि शुल्क वृद्धि छैन,’ सूचनामा भनिएको छ,‘बरू यात्रुहरुलाई परेको असहज परिस्थितिमा सहजीकरण गर्न हामीले राइडरहरूलाई कम्पनीको तर्फबाट क्वेस्ट र इन्सेन्टिभ दिएर राइडरहरूलाई धेरै राइड गर्न प्रोत्साहन गरिरहेका छौं।’
अफलाइन राइड गर्दा जोखिम हुने भएकाले एपमार्फत नै राइड गर्न अनुरोध गरेको छ।
‘अफलाइन यात्रा गर्दा सो को रेकर्ड सिस्टममा नहुने, बीमा नहुने र विभिन्न प्रकारका आपराधिक घटनाको जोखिम हुने भएकाले मोबाइल एपबाट मात्रै राइड लिन हामी अनुरोध गर्दछौं,’ सूचनामा उल्लेख छ, ‘साथै केही समस्या पर्दा २४सै घणटा पठाओको कल सेन्टरको नम्बर ०१-५९७००९९ मा सम्पर्क गरी पठाओ राइड सम्बन्धि गुनासो र उजुरी गर्न सकिनेछ।’
