भारतको ओडिसामा एक वृद्धाले आफ्नै नातीलाई बेचिदिएको घटना सार्वजनिक भएको छ।
गत बिहीबार ओडिसाको बादलिया गाउँकी ६५ वर्षीया मन्द सोरेन नाम गरेकी वृद्धाले आफ्नो ७ वर्षीया नातीलाई मात्रै २०० रूपैयाँमा बेचिदिएको भारतीय सञ्चारमाध्यमहरूले जनाएका छन्।
इन्डिया टुडेका अनुसार वृद्धाले २०० रूपैयाँ लिएर आफ्नो नाती एउटा जोडीको जिम्मा लगाएकी थिइन्।
गाउँलेहरूले थाहा पाएर प्रहरीलाई खबर गरिदिएपछि प्रहरीले बालकको उद्धार गरेर बाल हेरचाह गृह पठाएको थियो।
त्यसपछि प्रहरीले घटनाको अनुसन्धान गरेको थियो। अनुसन्धानबाट वृद्धाले पैसाकै लागि नाती नबेचेको खुलेको छ।
इन्डिया टुडेका अनुसार ती वृद्धाका घरजग्गा छैन। श्रीमान वर्षौंअघि बितिसकेका थिए भने छोरा बेपत्ता छन्। बुहारी पनि कोरोनाकालमा बितेकी थिइन्।
उनले राज्यबाट पनि अहिलेसम्म कुनै सहायता नपाएको पाइएको भारतीय सञ्चारमाध्यमहरूले जनाएका छन्।
आफू वृद्धा भइसकेको, स्वास्थ्य अवस्था पनि दैनिक खस्किँदै गएपछि उडिसाकै रायपाल गाउँमा रहेकी बहिनीकोमा बस्न थालेकी थिइन्।
सोही गाउँमा उनले एउटा अपिरिचित जोडीलाई नातीको जिम्मा लगाएकी थिइन्। त्यो जोडीसँग वृद्धाले केही पैसा पनि लिएकी थिइन्।
नातीको गाँस, बास, कपासको मात्रै होइन पढाइदिने ज्ञारेन्टी भएपछि वृद्धाले बालकलाई एउटा जोडीको जिम्मा लगाएको भनेर इन्डिया टुडेले लेखेको छ।
वृद्धाले नातीलाई अरूकै जिम्मा लगाएको थाहा पाएपछि स्थानीय पञ्चायत सदस्यहरूले वृद्धाले दुई सय रूपैयाँमा नाती बेचेको भनेर प्रहरीमा खबर गरेका थिए।
प्रहरीले बालकको उद्धार गरेपछि बाल हेरचाह गृहका अधिकारीहरूले बालकको परिवारलाई भेटेका थिए।
'उहाँले आर्थिक लोभमा परेर आफ्नो नाती बेच्नुभएको होइन बरू आफूले नसक्ने भएपछि बालकको उज्ज्वल भविष्य सुनिश्चित होस् भनेर अर्कोको जिम्मा लगाउन खोज्नुभएको रहेछ,' हेरचाह गृहका एक अधिकारीले इन्डिया टुडेलाई भनेका छन्।
घटनाको वास्तविकता थाहा भएपछि स्थानीयले वृद्धालाई राज्यले दिने सहायता उपलब्ध गराउन माग गरेका छन्।
-1746009348.jpg)
