राष्ट्रिय स्वतन्त्र पार्टी (रास्वपा) ले पार्टीका शुभेच्छुक तथा समर्थकहरूको सामाजिक सञ्जालमा अराजक उपस्थिति पार्टीलाई नै घातक हुने बताएको छ।
कार्यवाहक सभापति डोलप्रसाद अर्याल (डिपी) ले बिहीबारको केन्द्रीय समिति बैठकमा फेसबुकलगायत सामाजिक सञ्जालमा रास्वपाका शुभेच्छुक र समर्थकको अराजक उपस्थितिप्रति ध्यानाकर्षण भएको बताएका हुन्।
‘कार्यवाहक सभापति अर्यालज्यूले सामाजिक सञ्जालमा राष्ट्रिय स्वतन्त्र पार्टीको शुभेच्छुक तथा समर्थकहरूको अराजक उपस्थितिप्रति ध्यानाकर्षण भएको र यो हाम्रो लागि नै घातक हुने, हामीले यसलाई अनियन्त्रित छोड्यौं भने कुनै दिन हाम्रो लागि नै घातक हुने र यसमा सबै सदस्यहरूलाई पार्टीले बनाएको सामाजिक सञ्जाल प्रयोग आचारसंहिताअन्तर्गत रहन र अभ्यास गर्न र सभ्य रूपमा प्रस्तुत हुन उहाँले अनुरोध गर्नुभएको छ,’ कार्यवाहक प्रवक्ता मनिष झाले भने।
साथै रास्वपा कार्यवाहक अर्यालले सामाजिक सञ्जालमा अनावश्यक रूपमा नबोल्न र नलेख्न पनि अनुरोध गरेको उनले बताए।
सामाजिक सञ्जालमा देखिने अमर्यादित, अशिष्ट, अभद्र प्रवृत्तिलाई पार्टी पंक्तिबाट निरुत्साहित गर्न कार्यवाहक सभापति अर्यालले निर्देशन दिएका थिए।
