चर्चित कलाकार तथा सांगीतिक समूहहरूको प्रस्तुतीका साथ एनसेल आजियाटा लिमिटेडले जेठ १३ गते शिनबार हाटखोला मैदान, विराटनगरमा कन्सर्ट आयोजना गर्ने भएको छ। यसका लागि सम्पूर्ण तयारी पूरा भएको एनसेलले जनाएको छ।
कन्सर्टमा दीपक बज्राचार्य र रिदम ब्यान्ड, आषिश राना (लाउरे), शिव परियार, द एलिमेन्ट्स, अस्मिता अधिकारी, सुनिल पण्डित, कलाकार केकी अधिकारी लगायतको प्रस्तुती हुनेछ। कन्सर्ट दिउँसो २ बजेबाट सुरू भई बेलुका ८.३० बजेसम्म चल्ने कम्पनीले जनाएको छ।
यस सांगीतिक कार्यक्रममा सहभागी हुन ईच्छुक एनसेलका ग्राहकहरूले नजिकैको एनसेल सेन्टर वा आधिकारिक बिक्रेताकोमा सम्पर्क गरी टिकट लिन सक्नेछन्। त्यसैगरी कन्सर्ट हुने स्थान हाटखोला मैदानबाट पनि टिकट लिन सकिन्छ।
'म लगायत रिदम ब्यान्डका साथीहरू र अन्य थुप्रै साथीहरूले यो कार्यक्रममा प्रस्तुती राख्दै छौं। आफ्ना साथीभाइ, परिवारका सदस्यहरूसँग आउनुहोस् र सँगै मिलेर रमाइलो गरौं,' दीपक बज्राचार्यले भने।
द एलिमेन्ट्स ब्यान्डले दर्शकहरूलाई आफ्ना गीतसंगीतले भरपुर मनोरञ्जन प्रदान गर्न आफूहरू तयार रहेको बताएको छ।
पूर्वमा रमाइलो गर्ने संयोग जुरेकाले दर्शकलाई यो मौका नगुमाउन आषिश राना (लाउरे) ले आग्रह गरे।
कन्सर्टको प्रत्यक्ष प्रसारण एनसेलको फेसबुक पेजबाट पनि हुनेछ।
कार्यक्रममा सहभागीको सुविधाका लागि कार्यक्रम स्थलमा एनसेलको स्टल पनि रहने छ। स्टल मार्फत कम्पनीले प्रदान गर्दै आएको सेवा तथा सुविधाका बारेमा जानकारी लिन सकिनेछ।
यस अघि एनसेलले नयाँ वर्ष २०८० को अवसरमा वैशाख २ गते शनिबार काठमाडौंको दरबारमार्गमा 'एनसेल प्रिजेन्टस् १६ औं दरबारमार्ग सडक महोत्सव पर्पल स्याटरडे' आयोजना गरेको थियो।
एनसेल आजियाटा लिमिटेड नेपालको पहिलो निजी मोबाइल सेवाप्रदायक कम्पनी हो।
