नेपाल चेम्बर अफ ट्याक्स कन्सलटेन्ट्सको आयोजनामा आगामी मंसिर २ गतेदेखि ५ गतेसम्म काठमाडौंमा अन्तर्राष्ट्रिय कर सम्मेलन आयोजना हुने भएको छ।
बिहीबार आयोजित पत्रकार सम्मेलनमा उक्त जानकारी दिँदै आयोजक संस्थाका अध्यक्ष रोशन पोखरेलले कर शिक्षा र क्षमता विकास, सरकारी निकायहरूसँग नीतिगत संवाद र वकालत तथा कर क्षेत्रमा अनुसन्धान र सुधारको उद्देश्यसहित सम्मेलन आयोजना गर्न लागिएको बताए।
'सम्मेलन विशेषगरी नेपालको कर प्रणालीको विकसित रूप प्रदर्शन गर्ने, नेपाली कर व्यवसायीहरूलाई अन्तर्राष्ट्रियस्तरका विशेषज्ञसँग जोड्ने र नेपाललाई ‘माइस’ गन्तव्यका रूपमा प्रवर्द्धनमा केन्द्रित हुनेछ,' उनले भने।
उनका अनुसार सम्मेलनमा ३५० जना अन्तर्राष्ट्रिय प्रतिनिधि र २०० भन्दा बढी नेपालका कर व्यवसायी, नीतिनिर्माता, सरकारी अधिकारी, व्यवसायी तथा विज्ञहरूको सहभागिता रहनेछ।
सम्मेलनले नेपालको कर र वित्त व्यवसायीहरूको क्षमता अभिवृद्धि, कर नीति र अनुपालनामा अन्तर्राष्ट्रिय अभ्यास आदानप्रदान र सञ्चार प्रवर्द्धन गर्नेमा अपेक्षा गरिएको छ।
यसमार्फत नेपालमा प्रत्यक्ष वैदेशिक लगानी प्रवर्द्धन तथा कर र लगानीका क्षेत्रमा अन्तर्राष्ट्रिय सहकार्य विस्तारमा सहयोग पुग्ने अध्यक्ष पोखरलले बताए।
सम्मेलनमा विकासशील देशहरूको कर प्रणालीको ऐतिहासिक विकास, उदाउँदो अर्थतन्त्रमा कर नीति कार्यान्वयनका चुनौतीहरू, विश्वव्यापी कर अनुपालनामा कर व्यवसायीको भूमिका, कर प्रशासनमा डिजिटल रूपान्तरणका अवसर र चुनौती, विकासशील अर्थतन्त्रमा कर व्यवसायीहरूको आचारसंहिता र व्यावसायिक दायित्व लगायतका विषयमा बहस हुनेछ।
सम्मेलनको आकर्षणका रूपमा मंसिर ५ गते आन्तरिक राजस्व विभागसँगको सहकार्यमा ‘प्राक्टिकल एस्पेक्ट अफ ट्रान्सफर प्राइसिङ’ विषयमा चार घण्टा लामो सेमिनार आयोजना हुनेछ।
सम्मेलन एसिया–ओसियान ट्याक्स कन्सलटेन्ट्स एशोसिएसनको समन्वयमा सञ्चालन हुनेछ।
नेपाल चेम्बर अफ ट्याक्स कन्सलटेन्ट्स सन् २०१८ मा स्थापना भएको हो।
संस्थाले नेपालमा करसम्बन्धी नीतिगत अध्ययन, कर विज्ञको प्रवर्द्धन, प्रचलित अन्तरराष्ट्रिय कर अभ्यासको विश्लेषण, कर व्यवसायीको संस्थागत विकास तथा करसम्बन्धी निकायसँग सहकार्य र समन्वय गर्दै आएको छ।
सम्मेलनमा २० देशका प्रतिनिधि सहभागी हुनेछन्।
सम्मेलनमा नेपालका साथै हङकङ, जापान, इन्डोनेसिया, कोरिया, मलेसियालगायतका व्यवसायी, नीतिनिर्माता, सरकारी अधिकारीलगायत हुनेछन्।
सम्मेलनमा विकासशील देशहरूको कर प्रणाली, उदाउँदो अर्थतन्त्रमा कर नीति, विश्वव्यापी कर अनुपालन, कर प्रशासनमा डिजिटल रूपान्तरण लगायत विषयमा सत्रहरू सञ्चालन हुनेछन्।
विशेष सत्रका रूपमा 'ट्रान्सफर प्राइसिङका व्यावहारिक पक्ष' लाई राखिएको छ। जुन सत्रमा ग्लोबल ट्याक्स एडभाइजर प्ल्याटफर्मका अध्यक्ष पियरजियोर्जियो भालेंटे पनि सहभागी हुनेछन्।
-1746009348.jpg)
