भदौ २४ गते उद्योग, व्यवसाय र निजी सम्पत्तिमाथि लुटपाट, तोडफोड र आगजनी गर्ने व्यक्तिहरू विरूद्ध प्रहरीले जाहेरी लिन नमानेको भन्दै नेपाल उद्योग वाणिज्य महासंघले आपत्ति जनाएको छ।
ती घटनाका दोषीमाथि छानबिन र कारबाही गरी सुरक्षा प्रत्याभूति दिलाउनुपर्नेमा उल्टै जाहेरीसमेत दर्ता नहुनुले समाजमा दण्डहीनता मौलाउँदै जाने र व्यवसायी हतोत्साही हुने महासंघले उल्लेख गरेको छ।
'घटनाका दोषीहरूमाथि जाहेरी दर्ता नगर्ने र कारबाहीमा उदासीनता देखिएको सदस्य व्यवसायीहरूबाट जानकारी प्राप्त भइरहेको छ। यस्तो अवस्था कायम रहे दण्डहीनता बढ्न गई लगानीको वातावरणलाई गम्भीर चुनौती दिने देखिन्छ,' महासंघले सोमबार जारी गरेको विज्ञप्तिमा भनिएको छ, 'यसले रोजगारी सिर्जना, राजस्व संकलन, लगानी प्रवर्द्धन र समग्र अर्थतन्त्रमा दिर्घकालीन असर पार्ने छ।'
निजी क्षेत्रको सुरक्षा प्रत्याभूतिका लागि महासंघले केन्द्र र जिल्लास्तरीय सुरक्षा समितिहरूमा आफ्नो प्रतिनिधित्व सुनिश्चित गर्न माग गरेको छ।
सम्बन्धित जिल्ला नगर उद्योग वाणिज्य संघका अध्यक्ष तथा प्रतिनिधिलाई सहभागिता गराउन उसले आग्रह गरेको छ। यसबारे गृह मन्त्रालयमा पत्राचार गरिसकेको महासंघले जनाएको छ।
'सबै तहमा सरकार–निजी क्षेत्र समन्वय र मुख्य गरी जिल्ला स्तरीय सुरक्षा योजना, जोखिम मूल्यांकन र आकस्मिक निर्णय प्रक्रियामा पनि व्यावसायिक समुदायको प्रत्यक्ष सहभागिता सुनिश्चित गर्न महासंघले समितिमा आफ्नो र सदस्य संघहरूको सहभागिताका लागि आग्रह गरेको छ,' विज्ञप्तिमा भनिएको छ।
महासंघका कार्यवाहक अध्यक्ष अञ्जन श्रेष्ठले शान्ति सुरक्षाबिना उद्यम व्यवसाय चल्न नसक्ने बताउँदै दण्डहीनता अन्त्य गरेर व्यवसायीमाथि आक्रमण नहुने सुनिश्चितता गर्न माग गरे।
निवर्तमान अध्यक्ष शेखर गोल्छाले देशको आर्थिक गतिविधि दिगो बनाउन र लगानीको वातावरण विश्वसनीय बनाउन सरकार सक्रिय हुनुपर्ने बताए।
अहिलेको अवस्थामा शान्ति सुरक्षा कायम गरी उद्योगी व्यवसायीको मनोबल उठाउन सरकारको ध्यान जान आवश्यक रहेको उनको भनाइ छ।
-copy-1761394385.jpg)
-1756446574.jpg)
-1746009348.jpg)
