भन्सार विभागले जेठ १४ गतेको दिन मात्रै तीन अर्ब २८ करोड बढीको भन्सार राजस्व संकलन गरेको छ।
एउटै दिन अत्यधिक आयात भएपछि राजस्व उल्लेख्य बढेको हो।
बजेट सार्वजनिक गर्ने अघिल्लो दिन विभिन्न वस्तुको भन्सार महसुल तथा अन्तशुल्क बढ्ने शंकामा व्यवसायीले धेरै सामानको भन्सार पास गराएका छन्।
त्यस्तै सबैभन्दा बढी कर उठाइने गाडीको आयात पनि यसदिन धेरै भएको कारण यसको प्रभाव भन्सार राजस्वमा देखिएको हो।
जेठ १४ गतेको दिन वीरगञ्ज नाकाबाट मात्रै एक अर्ब ३७ करोड राजस्व संकलन गरेको छ।
त्यस्तै रसुवा नाकाबाट ६१ करोड ५ लाख रूपैयाँ भन्सार राजस्व संकलन भएको छ।
भैरहवा भन्सार नाकाबाट ३४ करोड रूपैयाँ राजस्व संकलन भएको छ।
शीर्षकगत रूपमा जेठ १४ गतेको दिन एक अर्ब २७ करोड रूपैयाँ बराबरको भ्याट, एक अर्ब २१ करोड रूपैयाँको भन्सार महसुल, ३८ करोड रूपैयाँको अन्तशुल्क आयात भएको छ।
त्यस्तै एकै दिनमा २२ करोड रूपैयाँको पूर्वाधार कर, १० करोड रूपैयाँको सडक निर्माण दस्तुर, ४ करोड रूपैयाँ सडक मर्मत दस्तुर संकलन भएको छ।
यसले उल्लेखनीय रूपमा गाडीको आयात भएको देखाएको छ।
