संघीय सरकारले गर्त वर्ष सार्वजनिक संस्थानलाई गरेको ऋण लगानीमा ७ अर्बभन्दा बढीको हिसाब मिलान हुन सकेको छैन।
महालेखा परीक्षकको कार्यालयको प्रतिवेदनले सार्वजनिक ऋण व्यवस्थापन कार्यालयको लेखांकनमा समस्या देखाउँदै हिसाबमा फरक परेको उल्लेख गरेको छ।
'सार्वजनिक ऋण व्यवस्थापन कार्यालयको वार्षिक प्रतिवेदनअनुसार यो वर्ष ४१ अर्ब ९१ करोड ३ लाख ऋण लगानी देखिएकोमा एकीकृत वित्तीय विवरणमा ३४ अर्ब २९ करोड ७ लाख उल्लेख भएकोले ७ अर्ब ६१ करोड ९६ लाख फरक परेको सम्बन्धमा खुलासा गरेको छैन,' प्रतिवेदनमा भनिएको छ।
सार्वजनिक ऋण व्यवस्थापन कार्यालयबाट प्राप्त ऋण लगानीको विवरणअनुसार गत वर्षसम्म ८३ संस्थामा आर्थिक वर्ष २०७९/८० सम्म ३ खर्ब ९७ अर्ब ६ करोड ५० लाख ऋण लगानी भएको छ। गत वर्ष ४१ अर्ब ९१ करोड ३ लाख थप लगानी भएको उल्लेख गरिएको छ।
७ अर्ब २६ करोड १० लाख सावाँ फिर्ता भएको र अन्य समायोजनबाट थप भएको ६१ करोड ३५ लाख रूपैयाँ फिर्ता भएको महालेखाले जनाएको छ।
सबै रकम मिलान गर्दा वर्षान्तको ऋण लगानी हिसाब ४ खर्ब ३२ अर्ब ३२ करोड ७८ लाख रहेको देखाइएको छ।
नेपाल सरकारले सेयर तथा ऋण लगानी गरेका संस्थानहरूमध्ये निजीकरण भएका २१ संस्थानमा र १ अर्ब ३१ करोड ५५ लाख सेयर लगानी र १६ संस्थानमा ३ अर्ब १३ करोड ५५ लाख ऋण लगानी गरेको छ।
ऋण लगानीमध्ये सावाँ ३ अर्ब १३ करोड ५५ लाख र ब्याज ३ अर्ब ५१ करोड ३ लाखको भाका नाघेको छ।
निजीकरण भएका १५ संस्थानको दायित्व भुक्तानी गर्न नेपाल सरकारले ५ अर्ब ५१ करोड ३७ लाख थप लगानी गरेको छ।
सार्वजनिक संस्थानसँगको ऋण हिसाब मिलान एवं राफसाफ महालेखाले सुझाएको छ।
