प्राथमिक सेयर निस्कासन (आइपिओ) को अनुमति दिलाइदिने भन्दै नेपाल धितोपत्र बोर्डको नाम लिएर कमिसन मागेको विषयमा अख्तियार दुरूपयोग अनुसन्धान आयोगले बिहीबार जलविद्युत कम्पनीहरूका प्रवर्द्धकहरूसँग प्रमाणबारे सोधपुछ गरेको छ।
बिहीबार दिउँसो अख्तियारले स्वतन्त्र ऊर्जा उत्पादक संघ (इप्पान) का अध्यक्ष गणेश कार्कीसहितका केही पदाधिकारीलाई कार्यालयमा बोलाएर सोधपुछ गरेको आयोगमा पुगेका एक प्रवर्द्धकले सेतोपाटीलाई बताए।
'हामी सबैलाई व्यक्तिगत रूपमै उहाँहरूले (अख्तियार) बोलाउनुभएको हो,' ती प्रवर्द्धकले भने, 'हामीमध्ये केहीसँग प्रमाणका विषयमा पनि सोधिखोजी गर्नुभएको थियो।'
बुधबार आयोगका केही प्रतिनिधिहरू बोर्डमै पुगेर सेयर निस्कासन प्रक्रियामा रहेकाहरूको अवस्था बुझेका थिए। बोर्डबाट सेयर निस्कासनको प्रक्रियामा कम्पनीहरूको सूचीसहित करिब ७ पानाको विवरण आयोगले लिएको थियो।
मंगलबार इप्पानले सेयर अनुमति मागिरहेका कम्पनीका प्रवर्द्धक तथा संस्थापकहरूलाई डाकेको छलफलमा बोर्डका अध्यक्ष सन्तोष नारायण श्रेष्ठको नाम लिएर कम्पनीहरूसँग कमिसन मागिएको विषय उठेको थियो।
कम्पनीहरूले सेयर जारी गर्न लागिएको रकमको ५ देखि ७ प्रतिशतसम्म कमिसन बोर्डका अधिकारीहरूले मागेको दाबी जलविद्युत कम्पनीहरूका प्रवद्धकहरूले गरेका थिए।
यी पनि पढ्नुस्ः
मैले इप्पानका अधिकारीहरूसँग भेटेरै कुरा गर्दा उहाँहरू आफूले दोष नलगाएको भन्दै पन्छिनुभयो: धितोपत्र बोर्ड अध्यक्ष
जलविद्युत कम्पनी प्रवर्द्धकहरू भन्छन्– आवश्यक परे कमिसन माग्नेको नाम र एसएमएस बुझाउँछौं
